2028 bilsini gisepo lak 5.5 kamrangko ong·katatna miksongenga: CM
SHILLONG: Externally Aided Project-rang aro dingtang dingtang project-rangna sudni tangka paisarangko ra·sroengani a·sel Meghalaya a·dok grorang nangstapna sienga ine dingtang dingtang membor-rangni kenchake aganani gimin Mongolbar salo, a·dokni Chief Minister Conrad K Sangma, uni Budget-na aganchakanio talataniko on·angaha.
Budget session-ni bon·kamgipa salo, Budget-ni bidingo chanchirimanina aganchakaniko on·angengon, 2014-15 bilsioni 2018-19 bilsirangni gisepo Compound Annual Growth Rate (CAGR) 6.8 percent-san ong·aiahaoba, 2022-23 bilsioni 2024-25 bilsini gisepon CAGR 11.4 percent ong·na ka·dongsoengani gimin Meghalaya a·dokko 10 billion dollar economy ong·atna man·chongmotgen ine a·dokni Chief Minister Conrad K Sangma parakataha.
Skangona bate a·dok sorkari da·o bang·en koros ka·batenga ine janapatengon, 2015-16 bilsiode revenue aro capital expenditure gong kror 7954-san ong·aiachim indiba 2022-23 bilsiode revenue aro capital expenditure gong kror 21,390 ong·skaaha aro 2024-25 bilsiode total expenditure gong kror 27,072-mang ong·skagnok ine Chief Minister parakataha.
Chief Minister-ni aganani gitade, 2018-19 bilsio education department-na gong kror 2045-ko chamahachim indiba 2024-25 bilsiode ia department-na tangka chamani gong kror 3539-ona tang·doangaha.
PWD, Health, Planning aro Power department-rangoba tangka paisa chamani da·o 800-900 percent-ni gita tang·doangaha ineba ua aganaha.
A·dok sorkarini koros ka·gipa tangka paisarangni gimin talataniko on·angskaengon, gong kror 9371 tangkarangkode ma·mong sorkarioniko grant-ni bimango man·soaha aro gong kror 4041-kode a·doktangni rax revenue-oniko jakkalaha ine Chief Minister parakataha.
Central tax-ni share-rangko janapatskaengon, 2019-20 bilsio gong kror 4212-oni da·o 2024-25 bilsio gong kror 9466-ona tang·doangaha ine Chief Minister aganaha.
Chief Minister-ni parakatani gitade, Externally Aided Project-rangko salgro salaram a·dokrangna 72 percent-o grant dake on·aha.
Kamrangko ong·katate on·ani bidingo janapatskaengon, 2021 bilsioni ia sorkari lak 2.35 kamrangko ong·katate on·na man·aha aro 2028 bilsini gisepo lak 5.55 kamrangko ong·katate on·na miksongenga ine Chief Minister parakataha.
Tourism department-ni gimin janapatskaengon, batanggimin bilsi gittamni gisepon gong kror 465 tangkarangko koros ka·aha aro mikkang bilsibrini gisepo gong kror 4000-ko koros ka·angkugen ine Sangma aganaha.
Health department-ni gimin janapatskaengon, 2018-19 bilsio gong kror 980 koros ong·aoni 2024-25 bilsio gong kror 1,970-ona tang·doangaha ine Chief Minister parakataha.
