SHILLONG: Bharatiya Janata Party (BJP) sorkarini a·songna kamko ka·enga ine agananiara ‘tol·e dakmikgipasan’ ong·aia ine Budbar salo Congress dol matnangatenba, ia bilsini Lok Sabha election-o name chanchichengesa dilgiparangko seokchina, Meghalaya a·dokni manderangko didiataha.
Budbar salo, Shillong songjinmani Congress Bhawan-o kobor ra·timgipa manderang baksa agangrikengon, ma·mongo BJP-chi chalaienggipa sorkari, a·songna bang·en namgijaniko ra·baaha ine All India Congress Committee (AICC)-ni Northeast media coordinator Matthew Anthony parakataha.
2014 bilsio BJP, ma·mong sorkariko jako ra·chenga intalan a·songo tangka paisani gita, songsalni gita aro politics-ni gitaba namen kragijaniko dakahani gimin ia chang Lok Sabha election-ode manderang, name chanchichengesa dilgiparangko seokna gita nangenga ine ua aganaha.
Batanggimin bilsirango Congress dol, gualanirangko dakaha ine janapatengon, gualaniko dakaniara mandeni bewalan ong·a indiba uamang an·tangtangni guale dakgipa kamrangoni kate chakna jotton ka·jaha ine Anthony parakataha.
“Chinga chingni dakgualanirangko namatna jotton ka·aha aro a·songo songdongenggipa manderangna chanchiesa chinga ia a·songko chalaina jotton ka·aha. Ia chang a·songni manderang chingko seokpiltaigen ine chinga namen ka·dongenga,” ine Anthony aganaha.
Bilsi 10-na BJP sorkarini kragija dakaniko bon·atani somoi ong·engaha aro uni biapko Congress dolkon seokpiltaina nangengaha ineba ua aganaha.
India a·songo kamgri ong·e donganiko niatgenchimode namen jajrengna nangani ong·enga ine janapatengon, “A·songo songdongenggipa manderangoni bilsi 20-oni bilsi 24-ona 44 percent-ni gitade kamgri ong·e dongenggiparangsa ong·a. Graduate, postgraduate aro Ph.D dakgiparangoni 33 percent-de kamgri ong·e dongtokenga. 2012 bilsio Congress sorkari, bilsiprakon lak 75 kamrangko on·engachim indiba 2022 bilsiona kingkingan BJP sorkari, bilsiprako lak 29-ni gitan kamrangko on·na man·jaenga,” ine AICC-ni NE media coordinator aganaha.
Baditana kingking a·songni manderangko BJP, cha·boke cha·na jotton ka·kuenga ineba Anthony sing·doataha.