March 10-ni gisepo maming aganchakaniko on·jaode indefinite strike-ko ka·anggen: NGEA

TURA: Garo Hills Autonomous District Council (GHADC)-o kam ka·enggiparang, ja 32-ni dormaharangko man·kujaengani gimin Sombar saloni a·bachenge Budbar salona kingking salgittam, sit-in-demonstration-ko ka·angahaoba uamangni dormaharangko on·ani bidingo GHADC-ni Executive Committee (EC), maming aganchakanirangko on·jahani gimin Non Gazetted Employees Association (NGEA)-ni membor-rang, March 10 tarikona somoiko on·dapna tik ka·angaha indiba March 10 tarikni gisepo maming aganchakanirangko on·jagenchimode, March 11 tarikoni a·bachenge indefinite strike-ko ba ari gri jingjengataniko dakangskagen ine parakataha.
“Chingni man·na nangkuenggipa ja 32-ni dormaharangko on·china dabie chinga salgittamna tom·tome jingjengataniko dakahachim indiba ia salgittamni gisepo GHADC-ni EC, chingna maming aganchakaniko on·na gisik nangjahani gimin chinga namen duk ong·a. Uni gimin chinga February 29 tarikoni March 10 tarikona chingni dormaharangko on·china somoiko on·angkugen indiba March 10 tarikni gisepo maming aganchakanirangko on·jagenchimode chinga indefinite strike-ko ka·na draatako man·gnok,” ine NGEA-ni president Brithen Sangma parakataha.
March 29 tarik Bristibar saloni GHADC-o kam ka·giparang kamtangtangko ka·piltaignok aro kam nanggipa manderang office-ona re·bae an·tangtangni nanga kamrangko ka·ena gita man·gnok ineba NGEA-ni president parakataha.
Indake ong·engon, Garo Hills-ni A·chik National Youth Organisation (ANYO)-ni gitaba GHADC-o kam ka·enggiparangni jingjengatanio chakpaaniko parakataha aro Budbar salo ANYO-ni membor-rang, jingjengatenggipa NGEA-ni membor-rangko Tura-ni College Field-ona re·ange grongeaha.
“GHADC-o kam ka·enggiparangni man·na nangkuenggipa dormaharangko on·china chingaba an·tangtangni bil ama gita dilgiparang baksa agangrikna jotton ka·gen aro GHADC-o kam ka·enggiparangni jingjengatanirango bak on·pana ku·rachakenga,” ine ANYO-ni general secretary Ryan Ch Marak parakataha.
Iana skang, GHADC-ni Opposition MDC-rangba, GHADC-o kam ka·enggiparangni man·na nangkuenggipa dormaharangko on·china gita GHADC-ni CEM aro Executive Committee gimikkon mol·molatahachim ine nikna man·a.