SHILLONG: Ia bilsini Lok Sabha election-o Congress aro Trinamool Congress (TMC) dolrang nangrime Tura Lok Sabha constituency-o susagenchimode, National People’s Party (NPP)-ni candidate aro Tura-ni MP Agatha K Sangma-ko chena man·aigenchim ine Mongolbar salo Meghalaya TMC-ni vice president Zenith Sangma aganaha.
Ia chang Lok Sabha election-o Bharatiya Janata Party (BJP)-chi dilenggipa National Democratic Alliance (NDA) sorkariko be·gruatna gita miksonganio, Congress aro TMC dolrangkoba man·chape, BJP-ni kosako chakatenggipa dingtang dingtang political dolrang, I.N.D.I.A bloc-ni ning·o, seat-rangko sualgrike susagriktokengachim ine nikna man·a.
A·songni pilak biaprangon I.N.D.I.A bloc-o bakrimenggipa dolrang, seat-rangko sualgrike susaengoba Meghalaya a·dokode TMC aro Congress dolgnian, doltangtangni gitasa susaaigen ine adita salrangna skangsan, Meghalaya Pradesh Congress Committee (MPCC)-ni president aro Shillong-ni Lok Sabha MP Vincent H Pala parakatskaahachim.
Uni iandakgipa kattarangko aganahani gimin Meghalaya TMC-ni vice president Zenith Sangma-ba aganchakaniko on·angskaengon, Meghalaya a·doko Congress dol, seat-rangko sualgrike susana nangnikjaenga ong·ode Tura Lok Sabha constituency-o dolgnian bakrime susaani dongjawa aro doltangtangni gita susagrikaigen ine parakataha.
“Meghalaya a·doko Congress aro TMC dolrang nangrime, seat-rangko sualgrikani gnang susagenchimode Tura Lok Sabha constituency-o NPP-ni candidate aro Tura-ni MP Agatha Sangma-ko chena man·aigenchim indiba Congress dol, seat-rangko sualgrike susana nangnikjaenga ong·ode Tura Lok Sabha seat-o dolgnian an·tangtangari susaaigen,” ine Sangma aganaha.
MPCC president-ni agangipa kattarangara, BJP aro NPP gita dakgipa dolrangko chena gisiko nanggijaniko mesokani ong·enga ineba ua aganaha.
All India Congress Committee (AICC)-ni dilgiparangan seat sualgrike susaaniko nangnikengachim ine janapatengon, ia nangnikaniko jegalna gita MPCC-ni president Vincent Pala-sa AICC-na bate dal·batama ine Meghalaya TMC-ni vice president sing·doataha.
Garo Hills-o Congress dolni vote man·anide 9 percent-san ong·aiani gimin BJP-ni 13 percent vote share-na baten komibata ineba Sangma parakataha.
“2023 bilsini Assembly election-o chinga (TMC) 20 percent vote share-ko man·ahani gimin chingni party worker-rang pilakan Tura Lok Sabha seat-o TMC-ko susaatna nangnikenga,” ine ua aganaha.