TURA: Burma a·songni gue gran (supari)-rangko Bangladesh a·song gita Meghalaya a·dokona niam gri badingsrukbaengani a·sel gue bagan dake cha·enggiparang noksan ong·na nangtokengani gimin gipin Bangladesh a·song gita niam gri gue ra·napbaaniko champengchina East Garo Hills a·jani GSU aro A·chik Organisation for Social Welfare (AOSW), East Garo Hills a·jani Deputy Commissioner-na sedoataha.
Iani bidingo East Garo Hills a·jani Deputy Commissioner-na sedoatengon, gipin biaprangoniko gue granrangko ra·baengani a·sel a·doko gue bagan dake cha·enggiparang noksan ong·atako man·na nangenga aro chinirangkoba Garo Hills gita Bangladesh a·songona badingsrukatengani a·sel Garo Hills-o chinini dam rakbatenga ine Rongjeng-ni GSU aro AOSW dolrang parakataha.
“Gue granrangko Bangladesh a·song gita Dawki, Shillong, Nongstoin, Rongjeng, Dainadubi, Baghmara, Nongal, Songak aro Mendipathar gita maming lekka gri Assam-ona ra·napbaenga aro ia gue granrangko dam komibate man·engani gimin gue badinggiparang, Garo Hills-ni guerangko ra·na jechaktokengaha,” ine dolgni NGO-rang parakataha.
GSU aro AOSW dolrangni parakatani gitade, ia gue granrangko re·anggipa bilsini April ja intalan tonni ton Bangladesh gita Assam-ona ra·napbaenga aro da·o Garo Hills-o gue bagan dake cha·enggipa manderang, an·tangtangni guerangko palna man·jae noksan ong·atako man·tokengahachim.
Bangladesh a·songona niam gri chinirangko ra·angengani gimin badi ka·doangskaengon, India a·songni chinirangkoba, Dainadubi, Rongjeng, Nongal, Baghmara (NH-62) aro Mendipathar, Songsak, Darugre, Nongal aro Baghmara gita Bangladesh a·songona ra·anrongenga ine dolgni NGO-rang parakataha.
Indake ong·engon, NH-62 rama gita smu, gue aro chini salruraenggipa garirangoniko niam gri tangka gile ra·enga ineba GSU aro AOSW dolrang parakataha.
Tangka paisarangko badiaba dolrangsan ong·aigija A·king nokmani bimingoba gile ra·enga ineba dolgni NGO-rang matnangataha.