RESUBELPARA: North Garo Hills a·jao Water Resources (WR) department-ni executive engineer (EE) DP Muktieh-na sorkari, transfer order-ko on·ani ja·manba ua biaptangko watjaenga ine North Garo Hills a·jani GSU aro FAF dolrang parakatenba, salbongani gisepo ia officer biaptangko wate on·jagenchimode uni kosako jingjengatanirangko dakanggen ine mikrakataniko on·angaha.
NGO-rangni u·iatani gitade, Muktieh-na a·dokni Personnel department, re·anggipa January 25 tarikon transfer order-ko on·e South Garo Hills a·jaona apjitatskaahachim indiba da·alona kingkingan ua Baghmara-ni EE-na an·tangni biapko wate on·skakujaengachim.
Transfer order-ko man·ahani gimin Muktieh-ni biapo asongskanagipa South Garo Hills-ni EE-ba North Garo Hills a·jaona re·ange, an·tangni kamko jako ra·na bi·ahachim indiba Muktieh, an·tangni biapko wate on·skakujaenga ine dolgni NGO-rang parakataha.
Indake ong·engon, iani bidingo North Garo Hills a·jani GSU aro FAF dolrang, re·anggipa Bristibar salon, North Garo Hills a·jani Deputy Commissioner-na sedoataha aro ia EE-ko salbongani gisepon apjitatchina dabiangaha.
“A·dok sorkarini ge·etaniko ia officer maikai manigija dakna man·a? Sorkari office-ara ua an·tangni biap ong·ja aro an·tangni skani gita jekoba dakna man·ja. Gipin biapona transfer ka·ako man·aha ong·ode ua ge·etgimin gita je biapona uko apjitatengachim, joljolan re·angna nanga,” ine NGH-ni GSU aro FAF dolrang parakataha.
Ia apsan officer-ni kosako matnanganirangko knana gitaba man·rongachim ineba dolgni NGO-rang parakataha.
“Ia EE, kam ka·enggipa contractor-rangna somoi gitaba tangka paisarangko gamrongja aro pangnan an·tangni seokgimin manderangnasan kamrangkoba on·rongaiachim. Basakobarangde gital tender-rangko bakkandikbegipa somoirango u·iatani a·sel joltangni contractor-rangde kamrangko man·rikparongja,” ine NGO-rang parakataha.
“Uni gimin chinga una salbonga somoiko on·enga aro Sombar salni gisepo ua biaptangko wate re·angjagenchimode uni kosako chinga jingjengatanirangko dakanggen,” ine NGH-ni GSU aro FAF dolrang parakataha.
