SHILLONG: A·songni gipin biaprangosan ong·aigija da·o Assam aro Meghalaya a·dokrangoba dingtang dingtang jat aro toromrangni gisepo so·sojengjeng ong·na a·bachenganiko nikna man·engahani gimin iandake so·sojengjeng ong·atna jotton ka·anirangko namatna gita ta·raken ja·kurangko de·china Shillong All Faith Forum (SAFF), Assam aro Meghalaya sorkarirangko didiataha.
Iandake jat aro toromrangni gisepo so·sojengjeng ong·atna jotton ka·anirangko namatchina a·dok damgnini sorkarirangko didiatengon, Assam aro Meghalaya a·dokrango songdongenggipa manderangkoba, iandake politics-ni man·gnina kam ka·giparangni gimin mikrakchina SAFF-ni dilgiparang didiataha.
“India a·songni salgro salaram a·dokrango ritchani ritcha jatrang donggenchimoba an·ching Manipur a·doko ong·enggipa obosta gitan da·o Assam aro Meghalaya a·dokrangoba nikna a·bachengengaha. An·ching toromko dilgiparang ong·e iani bidingo ku·rangko on·na nangchongmota aro iani bidingo manderangko mikrake dongchina u·iatna nanga,” ine SAFF-ni president Bishop Purely Lyngdoh parakataha.
Ri Bhoi a·jani Marmain-o donggipa Sacred Heart Secondary School-o Jisuni statue aro Kristianrangni ma·manti noksarangko ra·galchina gita Assam-ni dolsa NGO, ka·mikkenataniko on·aha ine matnangenba Bristibar salo Ri Bhoi a·jani Ri Bhoi Youth Development & Social Organisation (RBYDSO), Ri Bhoi Youth Federation (RBYF), Hynniewtrep Youth Council (HYC), Hynniewtrep Integrated Territorial Organisation (HITO), All Meghalaya Karbi Association (AMKA), aro Synjuk ki Rangbah Shnong Marmain Area (SRSMA) dolrangni nangrime bikotgipa Joint Action Committee (JAC), Ri Bhoi a·jani Deputy Commissioner baksa tom·aniko ong·atangahachim.
SAFF-o gitan Assam aro Meghalaya a·dokni dingtang dingtang jat aro toromni manderangkoba bakrimchina didiatengon, SAFF dolara dingtang dingtang toromni apsan bakrime kamko ka·enggipa dol ong·ani gimin ian dingtang dingtang jat aro toromni gisepo meli nangrime dongna man·aniko mesokaniba ong·a ine Bishop Lyngdoh parakataha.
“Chinga dingtang dingtang toromoni ong·genchimoba apsan nangrime ku·cholsan ku·rangko on·enggipa dol ong·a. Ian chingni gipin a·dokrangna aganprakani ong·enga aro gipin biaprangoba ia apsankon dakna man·gen,” ine SAFF-ni president parakataha.
Lok Sabha election sepangengahani giminsa badiaba dolrang ia cholko ra·e dingtang dingtang jat aro toromni gisepo so·sojengjeng ong·ataniko ra·bana jotton ka·engakon ineba Bishop Lyngdoh parakataha.
Political dolrangkoba iani bidingo apsan ku·rang on·china SAFF-ni president didiataha.