SHILLONG: Bang·bea chi aro rasing gitchakrangko badingsrukani bidingo srik srik kobor on·atgako man·e 110 Bn’-ni sima-arini out-post-jolo BSF sipairang dingtangmancha sandiaha unon a·songgipin sim-ari sepang Bangladesh-ona mal salanggipa denggu manderangko BSF dol nikaha. Bangladesh-chipak Bangladesh-ni denggu manderang bang·en mal-bosturangko bilaken badingsrukenga. BSF dol uamangko chanpengna ra·biaha indiba uamang neng·takgija re·drangna amaha. Jensalo denggu-rang BSF-ko ro·ong goe chadrapna amaha obosta namjabataha. Mikrakatako manijaha, uamangko katat-na matgni-bugni ong·gija-chi champengna jotton ka·aha unon denggurang atte-gitchi, siltong, wa·-tong-boltong aro ro·ong-rangchi chadrapaha, cha-drapako man·e sak gittam BSF sipairang saknaako man·aha aro uamangoni saksa jakrachini mikron bilongen saknaako man·-aha aro uko Shillong-ona ra·baaha. Denggurang BSF dolko saknaataha aro ua-mangni slairangkoba ra·-sekna jotton ka·aha. Cha-drapako warachakna ua-mangko kenatna bang-bango slai goaha indiba uamang kenjaha una gotaiaha unonsa kataha. Ja·mano obostako nion badingsrukgipa saksa siaha aro sakgipin bilongen saknaako man·aha.
A·jolo matchurangko, chi, rasin aro gipin malrangko Bangladeh-ona badingsrukanirang batroroenga indake sima-ari a·jolo tom·tome donganiko golmal ka·na jotton ka·enga. Ua a·selko sandienga aro champengani cholrangko namedake dakna nanggen.
