Shillong: Bi·saoni bia ka·ata dal·begipa songsalni namgijagipa kamko bon·atna sorkariko dakchakna legislation baksa ruuta somoionin a·dok sorkari kam ka·enga.
Bi·saoni bia ka·gipako ra·chakna man·gijagipa ong·a ine kam ka·ani bako kobor ra·timgiparangna Social Welfare Minister Paul Lyngdoh aganangaha.
POCSO Act, 2012-ni Khasi pe·gipa, songsalni gisepo awareness-ko on·a man·gen jeon saoba jean matrimony ba a·dokni gita bia ka·ani niamo bi·sako bia ka·atani napna man·jawa iako ua nie nikaha.
Jeba jean bi·sa ong·enga uko saoba bia ka·a uan POCSO-ni ning·o dosi dakanina dai gamna nanggipa ong·a ine Social Welfare Minister janapataha.
Janggi tanganio senggnang bi·sarangko bia ka·atenggipa ian skang chasongoni jarikbaenggipa ong·a aro ia daka rikani bewalrang skul napgijani rate-ko bariatanio on·gilgipa ong·a aro songsalo aro a·doko kangal ong·aniona sokatgipa ong·enga, ine ua nie niaha.
“Bi·sarang jemangan uamangni poraianiko dakangna nangkuenggipa bi·saoni bia ka·atanio napmanaha aro department-ni gita iani bidingo an·ching am·sandianiko dakaha. Iani bidingo dal·begipa social awareness-rangko ong·atna nanganiko chinga nikaha,” ine Lyngdoh aganaha.
Batanggimin bilsio uamang Early Child Development Mission (ECDM) jean mongsongbate dal·drobaenggipa bi·sarango jemangan bilsi 0-oni bilsi 8-ona sokao dingtangmancha chanchiana uamangni bil dongani gimin ma·siate on·a gisiko nangbataniko a·bachengataha ine Social Welfare Minister u·iataha.
“Kam ka·chapgiparang jekai EPCD kakket ong·gipa ramao ma·a paarangko ma·siate on·aniona dakchakgen jean sorkari baksa bakrimna bi·sani a·bachenggipa gadangko on·a uni nambatgipa ong·a,” ine Lyngdoh agandapangaha.
