SHILLONG: NPP-chi dilenggipa MDA sorkarini gital kuligipa bang·bata C&RD block-rangkon da·onan chalaichipgija donengani a·sel songni nokni manderang, dingtang dingtang scheme-rangko ra·anio neng·nikanirangko chagrongna nangtokenga ine Tura-ni MDC aro BJP Meghalaya-ni state vice president Bernard N Marak parakatenba, ia block-rangko ta·raken chalaina a·bachengatchina a·dok sorkariko didiataha.
Marak-ni parakatani gitade, re·anggipa 2023 bilsini Assembly election-na skang MDA sorkarini kulie on·gipa dingtang dingtang C&RD Block-rang, jekai Adokgre, Siju, Purakhasia, Batabari aro uandakgipa block-rangona ua re·ange nion, ia block-rango da·onan kamrangko ka·kujaengani a·sel songni nokni manderang, sorkarini ra·gatgipa scheme-rangko ra·na man·tokkujaenga ine nikna man·aha.
“Uni gimin songni nokni manderang, sorkarini ra·gate on·gipa scheme-rangko ra·anio neng·nikani grian ra·pana man·na gita ia block-rangko ta·raken chalaichina anga sorkariko didienga,” ine Marak parakataha.
Garo Hills-ni bang·bata block-rangon bang·a nokdangrangan PMAY nokrangko man·tokkujaenga ineba Tura-ni MDC, an·tangni suk ong·gijaniko parakataha.
“Angni nikani gitade, ia PMAY-ni namgniko man·paenggipa manderangna sorkari miksongmanchaen tangka paisarangko on·anio ja·manchakatenga aro iani a·sel bang·a nokdangrangan nokrangko matchote rikna man·tokkujaenga,” ine Marak parakataha.
PMAY nokrangko sal 95-ni gisepon matchotna gita nangachim ine janapatengon, badiaba badiaba nokdangrangde bilsi 5 bilsi 6-ni ja·manba skanggipa instalment-ko man·tokskakujaenga ine Tura MDC parakataha.
Bang·a block-rangon NREGA-ni hajirarangko matchote man·tokkujaenga ineba Marak parakataha.
“Bang·a block-rangon NREGA-ni kamrangko ka·gipa manderang, an·tangtangni man·na nangkuenggipa hajirarangko man·tokkujaenga aro bosturangna on·na nangenggipa tangka paisarangba batanggimin bilsi 4 bilsi 5-mangonin bangki dongkuenga. Bang·bata block-rangon nanggipa bosturangko VEC-rangna sokatna skang 50 percent-kode supplier-rang an·tangtangan kattirikchengenga aro iani a·sel bosturang chu·ongjaenga,” ine Marak parakatenba, PMAY aro MGNREGA-ni bangki tangka paisarangko ta·raken on·atchina sorkariko didiataha.