SHILLONG: Re·baenggipa Lok Sabha election-rangna nirok-simsakanirangko bilakbatatengon, Ri-Bhoi D.E.F aro CRPF-ni E/67 Battalion dolgni nangrimenba mija Robibaro Lad Umsaw-o chamchange sandisoanirangko dakmitingo, u·iatsogipa koborrangko man·e NL 01-AH-5853 gariko rim·soaha, jeon pekgipa ringanirangko ra·angenga ineba chanchichipgipa koborko u·iatahachim.
Indake apsan walon ramao chamchngsoenba gariko aro Babulal Sheikh minggipa mandeko rim·soaha.
Sing·sandianiko dakenba uni kosako NDPS Act-o pangchake mamlarangko segataha, indake garioniko chanchichipgipa dep 280 Ganja (Marijuana)-koba man·aha.
A·bachenge porikka ka·e nie man·ani gitade ua Ganja (marijuana)-an ong·a, jeon Kg. 4,746.409 mang gnangchim.
