RANIKOR: Bangladesh a·songona niam gri rasin salanganiko Garo Students Union (GSU) Balat regional unit raken jegalataha.
GSU Balat unit-ni parakatani gitade, South West Khasi a·jani Ranikor Civil Sub Division-ni ning·o donggipa Balat jolrang gita, niamgri India a·songni rasinrangko Bangladesh a·songchi salantian gari bol ritchani ritcha rama re·sretna jokpilgija dal·a, chona garirango salangrongenga.
Bangladesh a·songona rasin salangenggipa garirangko Pulis aro BSF melie watatna nanga ong·jaode, indita garirang rama re·sretna jokpilgija Balat jolo riting riting dake jachangjawachim ineba GSU Balat unit-ni dilgiparang matnangataha.
Indake, niam gri India a·songni rasinrangko Bangladesh a·songchi salanti gari bol ritchani ritcha salangani a·sel a·doko rasinrangni dam namen tang·dororoenga ine janapatengon, India aro Meghalaya sorkarirang ta·raken, Bangladesh a·songona rasin badinganiko champengatna nanga ine GSU Balat unit-ni dilgiparang dabiangaha.
Balat jolo rama dilsasan ong·ani gimin, songre songabatgipa manderang aro dingtang dingtang nanga kamrangna re·a doanirango jolni manderang rama chakpilgija garirang jachange dongani a·sel namen neng·nikaniko man·enga ineba GSU parakataha.
“Chinga Shillong-oni pring 4 bajio re·chakatbaaha, indiba da·o 11 baji ong·oba nokona sokkuja. Shillong-na baten Balat jolo rasin salgipa garirang jam ong·enga. Indake niam gri a·song gipinchi rasin salangako Meghalaya sorkari nie dongaigenma? Adita salrangna skang Moheskola jolo Bangladesh-chi chinirangko badingsrukatenggipa adita bol garirangko pulis aro BSF-rang rim·aha, indiba ia rasin salanggipa garirangkode pulis aro BSF-rang maina rim·gija watatskaenga?” ine GSU Balat unit-ni dilgiparang sing·doataha.
“Uni gimin, Meghalaya sorkari Balat jolrang gita Bangladesh-ona rasin salanggipa garirangko ta·raken champengatna nanga, ong·jaode GSU nidame dongjawa aro raka ja·kurangko de·anggen,” ine GSU Balat unit mikrakataniko on·angaha.