TURA: India aro Bangladesh a·songni sima gita niam gri ma·manti bosturangko badingsrukengani a·sel game ge·e cha·enggipa manderang aro a·dok sorkariba noksan ong·atako man·na nangengani gimin a·doko songdongenggipa manderangni namgnina South Garo Hills a·jao border haat damgittamko kulidape on·china aro Baghmara-ni Land Custom Station (LCS)-ko ta·raken chalaichina South Garo Hills a·jani social activist ba songsalna kamko ka·enggipa Greneth M Sangma, a·dokni Chief Minister Conrad K Sangma-na sedoataha.
Iani bidingo a·dokni Chief Minister-na sedoatengon, South Garo Hills a·jao border haat-rangko kulidape on·china aro Baghmara-ni LCS-ko ta·raken chalaichina Commerce & Industries Department-ni director-na sedoatahachim indiba da·alonan iani bidingo maming ja·kurangko de·a dongkujaenga ine Sangma parakataha.
“Ia sal somoirango gipin a·songrangoni guerangko Bangladesh gita niam gri ra·napbaengani a·sel a·doko gue bagan dake cha·enggipa manderang noksan ong·atako man·na nangtokenga aro ia sima jolrango guerangkosan ong·aigija matchu matte, bol wa·a, koela, chini aro uandakgipa ma·manti bosturangkoba badingsrukenga. A·song damgnini simarango BSF sipairang nirok sandianirangko dakengoba, niam gri bading chiwalgrikaniko champengna man·jaenga,” ine Sangma parakataha.
“Uni gimin sima jolrango niam gri badingsrukaniko champengna man·na gita aro a·doko game ge·e cha·enggipa manderang noksan ong·atako man·jana gita South Garo Hills a·jao border haat damgittamko kulidapchina aro Baghmara-ni LCS-ko ta·raken chalaichina anga South Garo Hills a·jao songdongenggipa manderangni pal nang·ko mol·molatenga,” ine Chief Minister-na sedoatgipa chittio Greneth Sangma parakataha.
