NONGSTOIN: West Khasi Hills a·jani Aradonga jol gita niam gri koelarangko salruraengani a·sel rama jal·langrang nosto ka·ako man·tokengaha ine matnangatenba, Aradonga Dorbar centre-ni president aro secretary, Aradonga police station-o FIR ka·doangaha.
Songko dilgiparangni FIR-o parakatani gitade, niam gri koela salruraenggipa garirang, dongimin niamna bate aro maming challan gri, Meghalaya a·dokni Riangdo aro Athiabari gita re·bae Assam a·dokni Boko-ona kingking koelarangko salbarongengani a·sel rama jal·langrang nosto ka·ako man·enga aro a·doknaba kajina man·anio gimaani ong·engachim.
Ia rama gita salantian truck-ni truck garirang, dongimin niamna bate koelarangko salruraengani a·sel ramarang re·na gita namsrangjaengaha ine janapatengon, iani bidingo ta·raken sandirokaniko dakenba, ia rama gita niam gri koela salruraaniko champengatchina Aradonga Dorbar centre-ni dilgiparang, sorkariko didiataha.
Iani bidingo, West Khasi Hills a·jani Superintendent of Police (SP) Bikram D Marak-o sing·sandiaton, ia manderangni badi ka·aniko police-rang am·sandienga indiba badi ka·gipa manderang an·tangtangan sakkirangko on·na gita re·batokjaengani gimin sandirokaniko dakanio neng·nikanirangko man·na nangenga ine parakatskaaha.
“Ia kamo Transport aro DMR office-rangkoba man·chapani gimin chinga ia department-rang baksa agangrikna jotton ka·enga,” ine West Khasi Hills a·jani SP parakataha.
