SHILLONG: Meghalaya a·doko ra·gate ka·enggipa ma·mong aro a·dok sorkarini scheme-rangni bidingo manderangna u·iatanide uni kam ong·ja indiba a·dok sorkarini kamsa ine Sombar salo, Shillong-ni Lok Sabha MP Vincent H Pala a·kangataha.
“Scheme-rangni bidingo manderangna u·iatanide a·dok sorkarini kamsa aro ia scheme-rangni gimin manderangna u·iatna gita a·dokna tangka paisarangko gamaha,” ine Pala aganaha.
Sorkarini ra·gate on·gipa scheme-rangni bidingo manderangna u·iatjaenga ine NPP-ni candidate Ampareen Lyngdoh-ni matnanganina Shillong-ni MP, ia kattarangko aganchakaha.
Scheme-rangoni bang·batan a·dokni kamsa ong·a ine janapatengon, badiaba somoirango sorkari uko nangnikenga ong·ode ua manderangna u·iatanio dakchakanirangko on·paenga indiba saksa MP ong·e ua gimik kamkode ka·na man·ja ine Pala aganaha.
Shillong Parliamentary constituency-o uko manderang nikrongtokja ine matnanggipani gimin sing·on, ua an·tangni constituency-ko nichanggalengama ma manderang baksa ong·enga, ukode constituency-ni manderangsa agangen ine Pala parakataha.
“Grongna man·batsranggipa MP-rangoni angaba saksa ong·a. Ampareen Lyngdoh-de Shillong-o songdongenggipa manderangkosan nirokna nangaia indiba angade Shillong songjinma baksana songadam nokadamrangkoba nirokna nanga,” ine ua aganaha.
“Songjinmaoni ong·kate songrangona re·anggenchimode na·simang pilakkon ma·sigen,” ine Shillong MP aganaha.
