SHILLONG: Meghalaya a·doko donggipa Umiam-oni Assam a·dokni Cachar a·jao donggipa Panchgram-ona ta·rakbate bosturangko salrurana aro songreenggipa manderang maming neng·nikani gri songre songgabatna man·na gita bakan ramako tarinaba dongaha.
NHIDCL-o kamko ka·enggipa official saksani u·iatani gitade, ia dal·begipa project-na uamang DPR-ko tariengaha aro korosrangkoba hisapengaha aro ia ramako chu·sokatbebena man·genchimode ian Meghalaya a·dok gita a·briarigipa biapo re·a doani kamrangko altubatatgnokchim.
Ia project-ni ning·o, ‘high speed corridor’-ko Umiam-oni a·bachenge, Shillong Bypass, Mawryngkneng aro Ratcherra gita nappake, Assam a·dokni Cachar a·jao donggipa Panchgram songo naegen.
Ia project-ni ning·o kilometer 160-mangni gita ramako tarina miksongenga aro ramako tarianio gong kror 15000-16000-mang ong·naba gnang ineba official aganaha.
Da·o dipet Silchar aro salgro salaramni gipin biaprangona songre songgabatenggipa manderang, Ratacherra ramarango a·arang rurongrongengani a·sel aro ramarang namjani a·sel neng·nikanirangko chagrongna nangrongengachim.
Western Bypass-ni gimin janapatskaengon, ia project-na a·arangko on·na nanggipa a·a nokgiparangna gamna gita NHIDCL, gong kror 670-mangko a·dok sorkarina watataha ine NHIDCL-ni official parakataha.
