TURA: Budbar salo, West Garo Hills District Legal Services Authority (DLSA)-ni gita Legal Awareness program-ko Kherapara bazar-o ong·atangaha.
Ia program-ko DLSA, Meghalaya State Legal Services Authority baksa nangrime National Legal Services Authority-ni ning·o ong·ataha aro ia awareness program-ko songni nokni manderangna maming koros gri indin ainni gita dakchakanirangko on·enggipani bidingo ma·siate on·na ong·atangaha.
Ia program-ko ong·atanio, Tura DLSA-ni Chief Legal Aid Defence Counsel Rania K Marak, jinmana aganprakengon, nokdango aro dingtang dingtang biaprango kragija dake jakkalako, doka satako aro kal·ake roako man·enggipa me·chikrangna Constitution-ni ning·o on·enggipa naljokanirangko agan-talate on·angaha. Iandakgipa kamrangni bidingo badi ka·na gita kacharirangona re·angna sikjagenchimode West Garo Hills a·jao One Stop Centre-rang donga aro manderang ia biaponaba re·ange dakchakanirangko ra·na man·a ineba Marak aganaha.
Indian Constitution-ni ning·o donggipa Section 498 A IPC, Article 15-ni ning·o me·chikrangna on·gimin bilrangni bidingo janapangengon, ian segipani ba segipani ma·drangrangoni kragija dakani ba onchepanirangko chel·chakna gita me·chikrangna dongimin niam ong·a ine Marak aganaha.
Section 125 CrPC-ni ning·o donggipa Maintenance Law-ni gimin janapangskaengon, ia niamo pangchake segipa gale katna nanggenchimode jikgipa, an·tangni dedrangko alduna gita a·kangna bil donga ine Marak parakataha. Indake ong·genchimoba pangnan Legal Aid Counsel ba ukilni ku·pattianirangko ra·china gita ua me·chikrangko didiangaha.
An·tangtangni dedrangko aro chadamberangko pekatgipa bosturangoni chel·e donchina gitaba ua jolo songdongenggipa manderangko didiangaha.
Ian program-ko ong·atanio ua POCSO Act-ni giminba songni nokni manderangna agan-talate on·angaha.
