SHILLONG: Purno A Sangma sagini somoirangonin jekai election-na campaign ka·aniko North Garo Hills a·jao donggipa Adokgre songoni a·bachengatrongachim, ia changoba Lok Sabha election-na National People’s Party (NPP)-ni campaign ka·aniko re·baenggipa March-ni 15 tariko, Adokgre songonin a·bachengattaina sienga.
Iako Bristibar salo, NPP-ni state president aro a·dokni Deputy Chief Minister Prestone Tynsong, National People’s Youth Front (NPYF)-ni changgittamgipa state youth conference-ko ong·atanio, jinmana parakataha.
PA Sangma sagini somoio election changantian Adokgre songoni campaign ka·aniko a·bachengatanio cherongahani gimin ia songko ua ka·sabee ‘Chenanggre’ ine mingangahachim aro uandaken da·o uni minganggipa bimingchi Adokgre stadium-ko Chenanggre Stadium ine mingrikskaaha.
NPYF-ni tom·bimonganio a·dokni Deputy CM aro NPP-ni state president Prestone Tynsong, jinmana aganprakangkuengon, Lok Sabha election-o Voice of the People’s Party (VPP)-ni candidate-ko seokgija NPP-ni candidate-ko seokchina gita Khasi aro Jaintia Hills-ni manderangko didiangaha.
“Lok Sabha election-o VPP-ni candidate-ko seoke Parliament-ona watatgenchimode, ua Parliament-oba Hindi ku·sikko jegale ong·kate kataigen aro bilsi bongana iandake bak ra·pana man·jawa ine adita salrangna skangsan mande saksa aganengachim. VPP-ara Hindi ku·sikko jegalgipa dolsa ong·a aro Parliament-ode gimikan Hindi-kosa agantokaha. Uni gimin VPP-ni candidate-ko seoke Parliament-ona watatgenchimode indinsa ong·gramaigen,” ine Tynsong aganaha.
Adita salrangna skang ong·atanggipa Assembly-ni budget session-o Opposition membor-rangni jinma ong·katgrime katani gimin janapatengon, “Iako anga aganenga ong·ja indiba na·simang an·tangtangba live telecast ka·aniko niksona man·aha. Iako anga tol·e aganengaba ong·ja indiba ian uamangni ka·pong ong·aniko mesokanisa ong·a. Budget-ni bidingo chanchirimanina CM-ni aganchakna chakaton aro uni chu·gimik talataniko on·ani somoio Opposition membor-rang, niamko pa·sike ong·kate kataha,” ine NPP-ni state president parakataha.
VPP-ni president Ardent Miller Basaiawmoit saksamangmangsan ia sorkari gro bang·a ine matnangenggipa ong·a ine janapatengon, “Indide ua saksamangmangsan CM-ni budget-na aganchakaniko TV-oniko niahakon,” ine Tynsong parakataha.
Budget-ni bidingo talate on·aniko nangniktaienga ong·ode re·bae sing·sandiena man·aigen ine opposition membor-rangko didiatengon, “CM-ni kuturi namen dal·a aro angni kuturiba uni kuturioni sepanggrikaiani gimin uamang je somoioba re·bae sing·sandina man·aigen,” ine NPP-ni state president parakataha.
Tura Lok Sabha constituency-o Agatha K Sangma-ko aro Shillong Lok Sabha constituency-o Ampareen Lyngdoh-ko cheatna gita rakbate kamrangko ka·china party worker-rangko didiatengon, “Ia chango NPP, Shillong aro Tura Lok Sabha seat damgnionin a·dokni pal ku·rang on·na gita me·chik MP-rangko watate itihasko tarigen,” ine Tynsong a·kangataha.
 |
ReplyForward
|