Babadam-o LLIN-rango sualata
TURA: Bristibar salo, Tura-ni Lok Sabha MP Agatha K Sangma, Long Lasting Insecticidal Mosquito Net (LLIN)-rangko a·bachengate on·angenba, West Garo Hills a·jani Babadam PHC-o songni manderangna suale on·ataha.
Ia program-ko West Garo Hills a·jani District Vector Borne Disease Control Program (DVBDCP) ong·ataha aro ia tom·anio Tura-ni MP, jinmana aganprakangengon, see rakkianio pangchake 2015 bilsimangode a·doko malaria sagiparang sak 46,000-mangni gita dongachim indiba sorkarini rakbee kamrangko ka·anichi da·ode malaria saaniko man·giparang komiangkalaha ine parakataha.
Jolni medical officer-rangko aro Babadam PHC-o kam ka·enggiparangko mittelpilangengon, uamangni on·kange kam ka·anichi aro sorkari baksa bakrimanichi Meghalaya a·doko aro mongsongbate Garo Hills-o malaria aro dingtang dingtang sabisi sakanchirangko komiatna man·aha ine Sangma aganaha.
Meghalaya a·dokni Chief Minister Conrad K Sangma-ni dilanichi a·dok sorkari, an·seng baljokani kamrangna gisik on·bate kamko ka·enga aro songadam nokadamrangna dingtang dingtang scheme-rangko ra·gate on·enga ineba Tura-ni MP parakataha.
Ia program-ko ong·atani bidingo DVBDCP-ni Senior Medical & Health Officer in-charge Dr Bichitrani Ch Marak, jinmana talate on·angskaengon, ia LLIN musurirangko suale on·anichi Garo Hills-o malaria saaniko komiatna man·enga aro 2010-11 bilsirangonin ia LLIN-rangko sualanichi ia jolrango malaria saaniko bewal champengna man·aha ine parakataha.
Ia program-ko ong·atanio Tura-ni MP, dingtangmancha Nokrek Heights School-ni nokgipa Jasmine A Sangma-ni tangka paisarangko dakchakatanichi, ia jolrango Tuberculosis (TB) saenggiparangna cha·anirangkoba suale on·angjolaha.
Ia program-ko ong·atanio dongpae bakko ra·anggipa gipin manderangara, Rongram-ni BDO TN Sangma, Tura-ni DM&HO Dr JA Sangma, Babadam PHC-ni M&HO Urenggre songni Nokma Michael A Sangma, Rev Fr Sunny Mavelil aro gipinrang ong·a.