SHILLONG: Meghalaya a·dokni badiaba badiaba skul aro college-rango nangana batpile fee-rangko ra·engani a·sel manderang neng·nikanirangko chagrongna nangtokengani gimin sorkari skul aro college-rangna fee-rangko apsan ong·e tarie on·na gita a·dok sorkari, committee-ko songna tik ka·angaha.
“A·doko pilak skul aro college-rangan fee-rangko rakdugae ra·enga inede anga aganjaenga indiba sorkari skul aro college-rangna sorkari fee-rangko apsan ong·e tarina cholrangko nina nangenga,” ine a·dokni Education Minister Rakkam A Sangma aganaha.
Skul aro college-rangni fee-rangko komiatna gitade sorkari miksongani dongja ineba ua aganskaaha.
“Sorkarini dakchakanirangko man·enggipa skulrangode, mongsongbate kangal cholgrirangna fee-rangko kraa gita ra·na nangenga,” ine Education Minister parakataha.
Sangma-ni aganani gitade, college-rango chatro chatri sakprakoniko badita ka·e fee-rangko ra·enga uko Education department sandiataha.
“Kiang Nangbah Govt College-o sorkarini sanction ka·gipa sak 98 faculty membor-rang donge, bilsi gittamni BA course-na gong 7,460-ko ra·enga aro St Anthony’s College-o ge 101 sanction ka·gipa post-rang donge bilsi gittamni BA course-na gong 69,020-ko ra·skaenga. Tura Govt College-o ge 86 sanctioned post-rang donge gong 15,260-ko ra·enga aro St Mary’s College-o ge 65 sanctioned post-rang donge bilsi 3-ni BA course-na gong 84,780-ko ra·skaenga,” ine Education Minister parakataha.
Bang·bata college-rangnan a·dok sorkari koros aro dormaharangko on·e dakchakenga ine janapatengon, St Edmund’s, St Anthony’s, St Mary’s aro Shillong College-rangde an·tangtangni tangka paisarangchiba skigiparangko rakkiaha ine Sangma parakataha.
“Ia college-rang fee-ko rakdugae ra·enga ine aganna seng·gnangdukuenga indiba chinga fee ra·aniko niatchongmotgen. Lekka poraniode politics aro bading chiwalani kam dongna nangja,” ine Sangma aganaha.
A·doko gisik matsramgipa chatro chatrirang bang·batan fee-rangko gamna man·pajani a·selan college-rango poraina chol ong·tokja ine janapatskaengon, college-rango kraa gita fee-rangko ra·genchimode pilakan iandakgipa cholrangko man·pagen ine Education Minister aganaha.