SHILLONG: Meghalaya a·doko tangka paisani gita neng·nikanirangko chagrongna nangengani gimin SSA skigiparangni regularize ka·china dabianiko chu·sokatna man·kujawa ine a·dokni Education Minister Rakkam A Sangma parakataha.
Education Minister-ni parakatani gitade, SSA skigiparangko regularize ka·genchimode sorkari, bilsio komibeoba gong kror 300 tangkarangko koros ka·dapna nangao ga·akgen aro ian da·o dipet sorkarina namen neng·beani kam ong·kuenga.
“SSA skigiparangko regularize ka·aniara sorkarina namen rakbegipa ra·biani ong·enga. Uamangko regularize ka·genchimode uamangba (SSA skigiparang) sorkario kam ka·enggiparang gitan apsan dormahako dabitokskagenok,” ine Sangma aganaha.
Indake ong·genchimoba, sorkari skulrango skigiparang gitan SSA skulrango skigiparangba apsan kamrangkon ka·paengani gimin SSA skigiparangni obostako nambatatna gita sorkari cholrangko sandienga ine Education Minister parakatskaaha.
“Chinga State Education Commission-ni recommendation-naba sengkugen,” ine ua aganaha.
Meghalaya a·dokni dingtang dingtang SSA skulrango ge 1000-na baten bangbang ong·e dongenggipa kamrang donga ineba Education Minister parakataha.
“Skulrango poraigipa bi·sarang dongsrangjagenchimode chinga uandakgipa SSA skulrango skigipako rakkijaengaha indiba je skulrangon kraa gita poraienggipa bi·sarang dongachim, uandakgipa SSA skulrangna skigiparangko ra·na gita proposal-ko on·china chinga District Mission Coordinator-rangna ge·etaniko on·ataha,” ine Sangma aganaha.