Quarry nokgipa talataniko on·skaa
TURA: South Garo Hills a·jani Nokatgre songo ro·ong bikotna miksonge kamrangko ka·na a·bachengatengahani gimin Sonibar salo, Garo Students Union (GSU) Karukol regional unit-ni membor-rang, ia biapko nina gita re·angaha aro ia biapo ro·ong bikotna miksonganiko raken jegalataha.
GSU Karukol regional unit-ni president Nikudimush R Marak-ni u·iatani gitade, badiaba manderangni ia songo ro·ong bikotna miksongenggipa biapara, Meghalaya a·doko chubatsranggipa waterfall ba chidarerangoni damsa Re·nang Dare-ko man·chapenggipa biaprangsa ong·engachim aro ia biaprangoniko ro·ong bikotgenchimode ian ia jolni manderangna mikkim rasongko ra·baenggipa Re·nang Dare-ko nosto ka·an baksana ia jolrango songdongenggipa manderangni bagan barirangkoba nosto ka·a gita ong·gnokchim.
“Chingni ia biapona re·ange nion, ro·ong bikotna gita seokenggipa biapara mingnambegipa Re·nang Dare jolrangkoba man·chapenga ine chinga nikna man·aha. Ia chidareara Meghalaya a·doko chubatsranggipa darerangoni damsa ong·e ia jolni manderangna mikkim rasongko ra·bagipa gita ong·engani gimin chinga ia biapko nisigalna on·jawa aro ia biapo maming dakeba ro·ong quarry dakna on·jawa. Ia biapo ro·ong bikotaniko champengchina chinga district administrator aro jolni MLA Rakkam A Sangma-koba didiatenga,” ine Marak parakataha.
Ia jolo songdongenggipa mitam manderangni parakatani gitade, ia songo donggipa manderangni gue baganrangoni chel·kala biaposa ro·ong quarry-ko dakna gita songni nokma, a·ako on·ahachim indiba da·o ia biapo ro·ong quarry dakna miksongenggipa manderang, Nokmani on·gipa biapko gale, songo manderangni gue bagan dakenggipa biaprangosa ro·ongrangko bikotna gita wa·rengko salskaahachim.
“Ia biapo ro·ong quarry dakna wa·reng salgipa biaprangara nokdang ge·bongani gue baganrangkoba man·chapengani gimin ian ia nokdangrangni bagan bari dake cha·aniko nisie galani gitasan ong·aiigja ian ia songo donggipa a·brirang aro chiring chibisikrangkoba nisie galani gita ong·gnok. Uni gimin ia songo ro·ong quarry dakaniko chinga raken jegalenga,” ine songni manderang parakataha.
Indake ong·engon, GSU aro jolo songdongenggipa manderangni matnanganiko quarry nokgipa jegalatskaenba, ia biapo ro·ong bikotna gita pilak nangchongmotgipa lekkarangko tarichengahachim ine talataniko on·atskaaha.
“South Garo Hills a·ja gimikon licence gnang quarry-ko chalaienggiparang dongkujani gimin dingtang dingtang official-rangni didianiko man·e anga ia biapo ro·ong quarry-ko bikotna miksongaha. Nokatgre songni Nokma aro uni ma·drangrang angna NOC-ko on·ani ja·man angna DFO, Letter of Intent Issue (LOI)-ko on·e Non-Forest Land Certificate-koba on·aha. Pollution Control Board-ni Meghalaya Minor Concession Rules 2016-o pangchakesa angna permission-ko on·aha. Ia quarry-ko a·bachengatna anga bilsi gittamna an·tangni somoi aro tangka paisarangko koros ka·aha aro da·o angni kosako uamangni matnanganiara angko mikbue dakanisan ong·aia,” ine quarry nokgipa parakataha.
Ia ro·ong quarry-ko chalaianio Re·nang Dare, Balpakram aro Nokrek National Park Eco Sensitive Zone-rangna maming nangchakeani dongjawa ine talataniko on·angengon, Tura Wildlife DFO-ni gitaba una NOC-ko on·aha ine quarry nokgipa parakataha.
Deku, Sangki, Simsang, Chibe, Mahadeo aro Khasi Hills a·jarangoba niam gri ro·ong aro an·chengrangko bikotenga ine janapatengon, uni quarry-ni bidingo sing·dona skang, ia pilak niam gri chalaienggipa quarry-rangkon chipatchengchina quarry nokgipa didiatskaaha.