TURA: Garo Hills-ni chatro chatrirangna Tura-on porikka sechakani centre-rang donggenchimoba mitam chatro chatrirangde gipin biaprangonasa re·ange CUET-ko sena nangtokengani gimin A·chik Conscious Holistically Integrated Krima (ACHIK) dol, suk ong·gijaniko parakataha.
“Tura-on porikka seachakani centre-rang donggenchimoba Tura-ni mitam chatro chatrirangde gipin a·dokrangonasa re·ange CUET-ko sena nangtokskaenga. Ia CUET-ara India a·song gimikon university-rango admission-ko man·na gita ra·gatgipa porikkasa ong·ani gimin ian pilak chatro chatrirangnan apsan cholrangko on·na gitasa ka·dongsoengachim indiba Tura-ni chatro chatrirangde gipin a·dokrangonasa re·ange ia porikkako sena nangtokskaenga,” ine ACHIK dolni dilgiparang parakataha.
ACHIK-ni u·iatani gitade, Tura-ni bang·bata chatro chatrirangan CUET-ko sena gita Dibrugarh, Tezpur, Guwahati aro uandakgipa dingtang dingtang biapni centre-rangosa sena donatako man·tokaha ine uamangna badi ka·doangtokaha.
Gipin biaprangona re·ange porikkarangko sena nangengani a·sel chatro chatrirang an·tangtangni gamchatbegipa somoi aro tangka paisarangko bon·atna gita nangtokenga ine janapatengon, Garo Hills-ni chatro chatrirangba gipin biaprangona re·angna nanggija biaptangtangon donge ia CUET-ko sepana man·a gita cholrangko on·china ACHIK didiataha.
