TURA: Re·anggipa January jao ong·atanggipa Meghalaya Games-ni closing ceremony-o git ring·gipa dingtang dingtang dolrangna, event management-ni gita tangka paisarangko gamchipkujaenga ine matnangataha.
Ia Meghalaya Games-ko matchotatani attamo, Garo Hills-ni mingsinggipa dolrang, jekai Riprap, Haystack Ladies aro uandakgipa dingtang dingtang dolrangko git ring·atahachim indiba da·o ia Meghalaya Games-ko ong·ataoni jagni ong·pilengahaoba, ia program-ko ong·atgipa event manager-rang, git ring·gipa dolrangna tangka paisarangko gamchipkujaenga ine u·iataha.
Iani bidingo Riprap dolni membor aro git ring·gipa Browny R Marak, dingtangmancha West Garo Hills a·jani Deputy Commissioner-na sedoatenba, uamangni man·na nangkuenggipa tangka paisarangko ta·raken on·china didiataha.
Ia bilsini Meghalaya Games-ko January 15 tarikoni 20 tarikona Tura-o sokachakahachim ine nikna man·a.
