TURA: North Garo Hills a·jao gue bagan dake cha·enggipa aro gue badinge cha·enggipa manderangoniko badiaba badiaba dolrang niam gri kajina gile ra·enga ine Rongrong Constituency-ni MDC Rinaldo K Sangma parakatenba, iani bidingo ta·raken ja·kurangko de·china North Garo Hills a·jani Deputy Commissioner-ko didiataha.
Sangma-ni parakatani gitade, gue bagan aro gue badinganioniko kajina gilna gita Garo Hills Autonomous District Council (GHADC)-osan bil dongaiachim indiba North Garo Hills a·jani badiaba badiaba biaprango Resubelpara Municipal Board (RMB)-ni bimingoba gue badinggiparangoniko kajina gile ra·skaengachim.
“North Garo Hills a·jani badiaba badiaba biaprango gue badinggiparangoniko niam gri kajina gile ra·enga ina anga bang·en badi ka·anirangko man·soaha aro kajina gilenggiparangoni mitamde Resubelpara Municipal Board-ni bimingoba gilenga. Gue badingani kajinako ra·na gita GHADC-osan bil dongaia aro sorkarini darang department-on bil dongja ine anga gisik ra·ataniko on·na sikenga. Uni gimin gue badinggiparangoniko Municipality-ni biming kajina gilaniara namen niamni a·palo ong·enga,” ine Rongrong MDC parakataha.
Gue granrangko gipin a·songrangoniko niam gri ra·baengani a·sel da·ororo gue bagan dake cha·enggiparang aro gue badingenggiparang namen noksan ong·na nangtokenga ine janapatengon, iandake gue badinggiparangoniko kajina gile ra·anichi gue badinggiparang bate noksan ong·na nangdapkuenga ine Sangma, North Garo Hills a·jao gue badinggiparangoniko niam gri kajina gile ra·aniko ta·raken champengatchina North Garo Hills a·jani DC-ko didiataha.
