Ma·mong sorkarini on·atgipa scheme-rangni bidingo Tura MP-o sing·sandina nanga: Mukul

TURA: Re·baenggipa Lok Sabha election-na a·dokni gitcham minister aro Rangsakona-ni gitcham MLA Zenith Sangma-ko Tura Lok Sabha seat-na candidate dake parakatani ja·man Bristibar salo All India Trinamool Congress (AITC)-ni tom·aniko Tura-ni party office-o ong·atangaha aro ia tom·aniko a·dokni gitcham CM aro AITC Parliamentary Party-ni dilgipa Mukul Sangma an·tangan dilangaha.
Ia tom·anio Dadenggre-ni AITC MLA Rupa Marak baksana Tura Lok Sabha constituency-ni AITC candidate Zenith Sangma aro Garo Hills gimiko AITC-na kam ka·enggipa manderangba bak ra·angtokaha.
Ia tom·ani ja·man AITC-ni dilgipa Mukul Sangma, kobor ra·timgipa manderang baksa agangrikengon, Meghalaya a·doko NPP-ni dilanichi sorkariko chalaienga aro Tura-ni MP-ba NPP-ni membor-an ong·ani gimin ma·mong sorkarini ra·gate on·gipa scheme-rangni bidingo maming ku·rangko on·jawa ine iandakgipa scheme-rangni gimin Tura-ni MP-o sing·sanchina Tura constituency-ni manderangko didiataha.
“Garo Hills-o songdongenggipa manderang aro dingtang dingtang dolrangba chingni candidate-na chakpaaniko on·enga aro iani giminsa chinga Garo Hills-ni manderangni pal dilgipako watatna miksongaha. Ma·mong sorkarini ra·gate on·gipa scheme-rangko a·dok sorkarian jako ra·e nirok sandina nangachim indiba ia scheme-rangko chu·sokatengama chu·sokatjaenga, uarangko Tura-ni MP nirokna gisik nangjaha,” ine Sangma aganaha.
Sangma-ni parakatani gitade, Jal Jeevan Mission (JJM) aro uandakgipa dingtang dingtang ma·mong sorkarini scheme-rangko kam ka·anirang Garo Hills-o chu·sokgipa ong·jaengachim.
“Ia scheme-rangni bidingo Garo Hills-ni manderang, an·tangtangni MP-oniko sing·sandina nangenga indiba Tura-ni MP Agatha Sangma, an·tangan NPP-ni ong·e maming dakeba doltangni kosako re·jawa. Uni gimin ia Lok Sabha election-o chinga manderangni namgnina susaenga,” ine ua aganaha.
INDIA Bloc-o apsan bakrimgipa dolrang ong·e, Meghalaya a·doko seat-rangko sualgrikgija an·tangtangni candidate-ko parakahani gimin ua Congress dolni kamnaba kusi ong·gijaniko parakataha.
“INDIA Bloc-o AITC aro Congress dolgnian mongsonggipa dolrang ong·achim aro ia dolgnini dilgiparang ma·mongo baditaba chang apsan tom·ahachim. Indake ong·genchimoba, uamang Meghalaya a·doko AITC baksa bakrimna nangnikjaha aro an·tangtangni candidate-rangko susaatna tik ka·aha. Batanggimin bilsini Assembly election-o chinga lak 2-na baten vote-rangko man·aha indiba Congress-de chingna baten komibate man·aha. Uni gimin ia Lok Sabha election-oba manderang chingkon seokgen ine chinga ka·dongmanchaenga,” ine AITC-ni dilgipa aganaha.
Meghalaya a·doko ong·enggipa obostarangni gimin janapatskaengon, niam gri gipin a·songrangoniko gue badingsrukbaanichi aro dingtang dingtang bosturangko Bangladesh a·songona niam gri badingatenganichi a·dokni manderang nangchakeaniko man·na nangtokenga ine Sangma parakataha.
Adita salrangna skang, Shillong songjinmao IED boma gopretani giminba ua an·tangni suk ong·gijaniko parakataha.
“2020 bilsionin bilsiantian a·dokni skotong Shillong songjinmao komibeoba changsade IED boma goprettelaia aro ian namen jajrengna nangani ong·enga. Iani bidingo ma·mong sorkarikoba mikrakatna nangenga. Una agreba an·ching gipin biaprangoniko niam gri drugs ba pekatgipa samrangko niam gri ra·napbaanirangkoba nikna man·enga,” ine ua aganaha.
CAA-ko niam dake ma·mong sorkarini ra·gatahani giminba AITC-ni dilgipa suk ong·gijaniko parakataha.
“Ia niamko an·ching salgro salaram jol gimik jegalahaoba ma·mong sorkari an·chingni jegalaniko knachakgija ra·gatdraaha. Tura-ni MP Agatha Sangma, ia Bill-ko niam ong·atna skang jegalani pal batesa chakpaaniko on·aha. Iako Garo Hills-ni manderang maming dakeba gualna man·jawaha,” ine Sangma aganaha.