SHILLONG: 2018 bilsini Assembly election-o Khasi aro Jaintia Hills a·ja damgnini dam 36 constituency-rango UDP aro HSPDP dolgnini vote man·aniko hisapgenchimode ia bilsini Lok Sabha election-o Regional Democratic Alliance (RDA)-ni candidate Robertjune Kharjahrin, Shillong Parliamentary constituency-ni MP ong·manaha ine Robibar salo, UDP-ni president Metbah Lyngdoh parakataha.
UDP-ni president aro RDA-ni chairman Metbah Lyngdoh-ni aganani gitade, ua bilsini Assembly election-o UDP, 2,99,646 vote-rangko aro HSPDP, 66,049 vote-rangko man·aha aro dolgnini vote man·ani lak 3.65-na batahachim.
Khasi-Jaintia Hills a·ja damgnini dam 36 constituency-rango NPP, 3,17,022 vote-rangko man·ahani gimin bang·bate vote man·gipa dol ong·skaaha ineba ua aganaha.
“2018 bilsini Assembly election-o chinga dolgnichi apsan daken vote-rangko man·taigenchimode ia Lok Sabha election-o cheani cholrang dongenga,” ine Lyngdoh aganaha.
Indake ong·genchimoba, Lok Sabha election-rangode pu·onanirang komibatrongaiani gimin ia chango RDA-ni vote man·ani dingtangtelaigen ine UDP-ni president parakataha.
Shillong Parliament constituency-na gital MP-ko nangengahani gimin ia Lok Sabha election namen mongsonggipa election ong·enga ineba Lyngdoh aganaha.
“Congress dolni MP Vincent Pala-ko changgittamna kingking an·ching seokaha aro da·o an·ching a·dokni nanganirangko Parliament-o bilakbate ku·rang on·na man·gipa mandeko seokskana nangengaha,” ine UDP-ni president aganaha.
Social media-rango tol·pinape campaign ka·anirangko bebera·jachina gitaba ua a·dokni manderangko didiataha.
“Social media-rango ong·gija dake campaign ka·anirangko bebera·e an·ching an·tangtangni vote-rangko nisie galjana,” ine ua aganaha.
Indake ong·engon, Khasi jatni gisepo Voice of the People’s Party (VPP), ma·ekgrikatna jotton ka·enga Mawthadraishan-ni UDP MDC Jambor War matnangatskaaha.
Da·o VPP-ni president ong·enggipa Ardent Miller Basaiawmoit, 2017 bilsini October jao HSPDP-ni president ong·engmiting somoio RDA-ko bikotanio mongsonggipa ong·achim ine janapatengon, da·o ua (Basaiawmoit) a·dokni regional dolrangko bilgriatna gitasa jotton ka·skaengaha ine War parakataha.
