SHILLONG: Meghalaya a·dokni Lok Sabha constituency damgnioba Lok Sabha election-ko re·baenggipa April jani 19 tariko ong·atgnok ine Election Commission of India (ECI), Sonibar salon parakatahaoba ia seat damgnio susana gita Bharatiya Janata Party (BJP)-ni high command, candidate-rangko parakskakujaengani gimin Meghalaya a·doko BJP-ni dilgiparang dongsiksakna a·bachengtokaha.
BJP-ni gimik sak 267 candidate-rangko a·songni dingtang dingtang Lok Sabha seat-rango susana gita ma·mongni dilgiparang, adita salrangna skangsan parakattokaha indiba Meghalaya a·dokni candidate-rangkode parakskakujaengachim.
Koborko on·ani gitade, Shillong Lok Sabha seat-oni susana gita gimik sakbonga candidate-rang, BJP-ni tikitna susaenga aro uamangara, gitcham state president Ernest Mawrie, Cabinet Minister AL Hek, Fenela L Nonglait, Mewaker Lyngdoh Pakma aro Sumitra Laloo ong·engachim.
Tura Lok Sabha seat-oni susana gita sakdok candidate-rang BJP-ni tikitna susaskaenga aro uamangara, Tura-ni MDC Bernard N Marak, Boston Marak, Riya Sangma, KC Boro, Winnerson D Sangma aro Thomas Marak ong·skaengachim.
BJP-ni candidate-rangko March-ni 2 tariko skanggipa list-o aro March-ni 13 tariko gnigipa list-o ma·mongni dilgiparang parakatahachim indiba ia changgni parakatanion Meghalaya a·dokkode watchanggalahachim.
Indake ong·engon, ma·mongo National People’s Party (NPP)-ba BJP-chi dilenggipa National Democratic Alliance (NDA)-ni bak ong·engani gimin Meghalaya a·dokni seat damgnina BJP-ni candidate-rangko parakkujaenga ine mitam kobor on·timgiparang u·iatskaaha.
“Meghalaya a·dokni seat damgnina BJP-ni candidate-rangko batanggimin somoirangon parakatna man·ahachim indiba NPP-ni gita champengahani gimin candidate-rangko parakatkujaenga,” ine kobor on·timgiparang aganaha.