SHILLONG: Salgro salaram jolni dingtang dingtang dolrang jegalgrimtokahaoba ma·mong sorkari, Citizenship Amendment Act (CAA) 2019-ko ra·gatdraahani gimin North East Students Organisation (NESO), iani bidingo Supreme Court-o ijahar ka·doangaha.
CAA-ni niamrangko donatpilchina mol·molenba NESO, Supreme Court-o ijahar ka·angaha.
NESO-ni parakatani gitade, ia CAA 2019-ni ning·o Mizoram, Nagaland, Arunachal Pradesh aro Meghalaya, Tripura baksana Assam a·dokni Sixth Schedule a·jarangko watahaoba Assam a·dokni dam 27 a·jarangkode watchanggalkujani gimin ian salgro salaram jol gimiknan kenchakna nangani ong·engachim.
Skangonin salgro salaram a·dokrango Bangladesh a·songoni niam gri napsrukbae songdong a·chaktokengahani gimin salgro salaram jolni chonchongipa Tribal jatrangko naljoke rakkina gita salgro salaram jol gimikkon ia CAA 2019-oniko watna nanga ine NESO-ni chairman Samuel Jyrwa parakataha.
“CAA 2019-ko ra·gatanichi salgro salaram jolrango niam gri napsrukanirang batsranggnok, uni gimin salgro salaram jolrangode CAA-ni niamrangko watna nangchongmota,” ine Jyrwa aganaha.
CAA-ni niamrangko ma·mong sorkarini parakatani ja·man, Meghalaya a·dok gimikon North East Students Organisation (NESO), Khasi Students Union, Federation of Khasi Jaintia & Garo People, Garo Students Union (GSU) aro uandakgipa dingtang dingtang dolrang, CAA-ni niamrangko segimin lekkarangko so·e sorkarini kamko raken jegalattokahachim ine nikna man·a.
Ia CAA-ara Bangladesh, Pakistan aro Afghanistan a·songrango a·rikgalako man·gipa Hindu, Sikh, Buddhist, Jain, Parsi aro Kristianrangko India a·songo songdongkamna bil on·enggipa niam ong·achim.
