SHILLONG: Meghalaya a·doko Congress dolni dilgiparang, NPP-ni ‘B team’ aro BJP-ni ‘C team’ gitasa ong·engaha ine Voice of the People’s Party (VPP) matnangataha.
Meghalaya a·doko Congress dol, NPP-na kam ka·enga ineba VPP matnangataha.
VPP-ni ku·wattimgipa Batskhem Myrboh-ni aganani gitade, ia Lok Sabha election-o Congress dolni dilgipa Parliament-ona re·angna man·gen ine ka·dongenggipa Shillong parliamentary constituency-ni manderangna ja·mano duknikosa donsotokenga.
“Congress dolmangmangsan dingtang dingtang jat aro toromna aro mikkang niteani gri kam ka·gipa dol ine uamang bebera·tokachim indiba da·o Meghalaya a·doko Congress dolko dilenggiparangde bikpilsa ong·skaengaha,” ine Myrboh aganaha.
2019 bilsini Lok Sabha election-o Shillong parliamentary constituency-ni manderang, NPP aro BJP baksa bakrimna tik ka·ahani gimin UDP-ni kosako namnikgijaniko mesoknasa Congress dolni candidate Vincent H Pala-ko seoktokahachim ine janapatengon, da·o ong·enggipa Congress MP, an·tangni party-ni kosakon aro an·tango bebera·e seokgipa manderangni kosakon kamrangko ka·skaaha ine Myrboh parakataha.
“Meghalaya a·doko Congress dolko bilgriatgenchimosa NPP chu·sokgipa ong·na man·aiachim aro iako Pala-ni kamrangan chu·sokgipa ong·atskaaha,” ine ua aganaha.
VPP-ni parakatani gitade, Congress dolni MP, skanggipa Garo Hills-ni dilgipa Mukul Sangma aro unbaksa bakrimska dilgiparangko ong·katatchengna man·aha aro NPP-ni mongsongbatgipa bobilkon ra·galatna man·ahachim.
“Uni ja·man ua (Pala) Congress dolni bangki MLA-rangko ra·galate party-oni ong·katatna man·aha aro NPP-na kamrangko altubatataha,” ine Myrboh aganaha.
Meghalaya a·doko Congress dolko chu·gimik bilgriatsrange bilona re·bana man·ahani gimin NPP-ni Sangma-rangde, Shillong-ni Congress MP-ko mitteltokenggnok ineba ua aganaha.
Shillong-ni MP aro Congress candidate-de party-tangni membor-rangna bate NPP-ni dilgiparang baksasa melibata ine matnangatengon, 2018 bilsini bye-election-o cheani ja·man Tura-ni MP Agatha K Sangma-ko Pala an·tangan re·ange una an·tangni namgipa skaniko on·eaha aro ian uamangni gisepo meligrikaniko mesokani ong·aha ine VPP-ni ku·wattimgipa parakataha.