TURA: Mongolbar salo, chang 85-gipa CRPF Day-ko Tura-o donggipa 120 Bn CRPF maniangaha aro ia manianiko 120 Bn CRPF-ni Commandant PK Singh dilangaha.
Ia tom·aniko a·bachengatanio, a·songna dangdike on·anio janggitangtangko gimaatna nanggipa CRPF sipairangko gisik ra·e mande ra·pilskaaniko dakangaha aro uni ja·man Quarter Guard-o parade-koba ong·atangaha.
Ia tom·anio, 120 Bn CRPF-ni Commandant, sipairangna aganprakengon, a·songko chel·chakanio CRPF-ni on·gilanirangko gisik ra·atpilaniko dakangaha.
“A·songo chubatsranggipa gadangni medalko man·gipa sipai dol ong·e, CRPF dol a·songko warachakanio sipairang an·tangtangko on·kange kamko ka·aha aro ia sipairangni on·kangani gride a·songko warachakani kamrangara chu·sokgipa ong·jawachim,” ine 120 Bn CRPF-ni Commandant aganenba, CRPF sipairangko an·tangtangni kamna rasong chachina didiangaha.
Ia manianio, sianggipa sipai Sungadha Koch-ni jikgipa Purnima Koch-na 120 CRPF-ni Deputy Commandant Savita Yadav-chi boksisko on·enba mande ra·pilskaaniko dakangjolaha.
Uni ja·man adita sak officer-rangkoba kam ra·doate, Commandant PK Singh aro Second-in-Command Purshotam Joshi-ni jakchi mande ra·pilskaaniko dakangskaaha.
Ia salni attamo dingtangmancha cultural program aro Barakhana-koba ong·atangaha.
CRPF dolko 1939 bilsini July 27 tariko Crown Representative Police dake ra·doatani ja·man 1950 bilsini March 19 tariko, CRPF-na India a·songni gitcham Home Minister Sardar Vallabhbhai Patel, President colour-ko on·ahachim.
