TURA: Ia chang Lok Sabha election-o ua susajawa indiba kangal cholgrirangni namgnina kamrangko ka·e on·angkugen ine Robibar salo, Tura-ni MDC aro BJP-ni state vice president Bernard N Marak parakataha.
Meghalaya a·dokni Lok Sabha constituency damgnion BJP, National People’s Party (NPP)-ni candidate-rangna chakpaaniko on·na tik ka·ahachim ine nikna man·a.
BJP dolni dilgiparang, NPP-na chakpaaniko on·engani gimin Tura-ni MDC, Independent candidate ong·e Tura Lok Sabha constituency-o susaskanaba gnang ine chanchichipanirang ong·katengachim.
Indake ong·genchimoba, ia election-o ua susajawa ine Marak parakatahani gimin ian manderangni chanchichipaniko bon·atani gitaba ong·aha.
“Anga ia election-o susajawa indiba kangal cholgrirangna dangdike on·anian angni ka·oksiani ong·ani gimin anga kangal cholgrirangna dangdike on·angkugen. Manderangna namako dakna gita saksa candidate ong·gipa ong·na nangja. Angnade politics-ara namgipa ong·a aro je kamrangan kangal cholgrirangko ra·dona aro sakgipinrangna dakchakanirangko on·gipa ong·a uan namgipa politics ong·a,” ine Marak parakataha.
Manderangna cholrangko on·gijani aro kangal cholgrirangoniko ra·seke ra·anide namgijagipa politics ong·a aro iako manderang jegalna nanga ineba Tura MDC parakataha.
“Je manderangan namgipa politics-ko basea, uandakgipa manderangde an·tangtangni gamchatgipa vote-rangko tangka paisa jakkalsretani grigipa sorkarina, nambata songsalna aro namroro silroroaninasa on·gen. Garo Hills-ni songadam nokadamrango manderang BJP-ko gipinrangna bate namniktokbata maina BJP-ara kangal cholgrirangna kamko ka·gipa ong·a. Kangal cholgrirangde Modi-nan pu·onaigen maina PM Modi, kangal cholgrirangna nambata janggi tanganiko on·anichi hajalni hajal manderangni janggi tanganio dingtanganiko ra·baaha. Chingni kamrang chingni ka·baenga gitan ong·angkuaigen,” ine Marak parakataha.