SHILLONG: Re·baenggipa April 19 tariko ong·atna sienggipa Lok Sabha election-na Shillong Lok Sabha constituency-ni Congress candidate aro da·o ong·enggipa Shillong MP Vincent H Pala baksana Voice of the People’s Party (VPP)-ni candidate Ricky AJ Syngkon-ba da·al Mongolbar salni bako nomination file ka·anggen.
Nomination file ka·ani somoio VPP-na chakenggipa bang·a manderangan re·bagenchimode ramarango manderang neng·nikanirangko chagrongnaba gnang ine Syngkon-ni nomination file ka·ani somoio VPP-ni dilgiparangsan candidate baksa Shillong-ni Deputy Commissioner (DC) office-ona re·angaigen ine u·iatahachim.
Indake ong·engon, Tura Parliamentary constituency-ni Congress candidate Saleng A Sangma-ba da·al Mongolbar salni bakon an·tangni nomination-ko Tura-ni DC office-o file ka·enaba gnang ine kobor on·timgiparang u·iataha.
Da·o dipet Meghalaya a·dokni Lok Sabha seat damgnion candidate sakgnisan, nomination-rangko file ka·engkuachim aro uamangara Shillong Lok Sabha constituency-ni NPP candidate Ampareen Lyngdoh aro Independent candidate Peter Shallam ong·achim. Uamang sakgnian re·anggipa April 22 tariko, an·tangtangni nomination lekkarangko Returning Officer-na on·eahachim.
Nomination file ka·ani bon·kamgipa tarikara March 27 tarik ong·engani gimin election-o susaenggipa bang·bata candidate-rangan da·al Mongolbar salni bako nomination file ka·enaba gnang ine ka·dongsona man·enga.
Nomination lekkarangko March-ni 28 tariko scrutiny ka·anggen aro nomination-ko ra·pilani bon·kamgipa tarikara March 30 tarik ong·skaenga.
