SHILLONG: Meghalaya a·dokni Shillong aro Tura parliamentary constituency-rango Bharatiya Janata Party (BJP)-ni susagija National People’s Party (NPP)-na chakpaaniko on·skana tik ka·ahani gimin party worker-rang, uni kosako matnanganirangko daktokengon, a·dokni Lok Sabha seat damgnio susajana tik ka·aniara uni kam ong·ja indiba ma·mongo BJP-ko dilenggiparangni kamsa ine Sombar salo, BJP-ni state president Rikman G Momin talataniko on·angskaaha.
Meghalaya a·dokni Lok Sabha seat damgnio susagija NPP-na chakpaaniko on·skana tik ka·ahani gimin sing·on, ua BJP-ni state president ong·e, ma·mongo BJP-ko dilenggiparangni ge·etaniko dakna nangaia ine Momin parakataha.
“NDA-o bakrimenggipa dolna chakpaaniko on·na tik ka·aniara angni tik ka·ani ong·ja aro chinga Prime Minister-ko mande ra·na nangao ga·aka,” ine Momin aganaha.
Garo Hills-o BJP-ni dilgiparang, NPP-ni national president Conrad Sangma baksa tom·e chanchirimna dabienggipani gimin sing·skaon, ua Khasi Hills-ni dilgiparang baksade tom·e agangrikengaha ine BJP-ni state president parakataha.
“Khasi Hills-o skanggipa tom·aniko matchotahaon a·dokni Chief Minister, Garo Hills-o BJP-ni dilgiparangkoba grongna sienga,” ine Momin aganaha.
Meghalaya a·doko susajana chanchianiko ra·pilchina gita ma·mongni dilgiparangko mol·molna tik ka·ani ja·manba maini gimin ua NPP-ni national president-ko grongeskaaha ine sing·anina aganchakaniko on·angengon, ia tik ka·aniko nipiltaichina ua ma·mongni dilgiparangko didiatmanaha ine Momin parakataha.
“Ma·mongni dilgiparang aganahani giminsa anga Chief Minister-ko grongenba, NPP-na chakpaaniko on·ena nangaha,” ine ua aganaha.
Ma·mongni dilgiparang, a·dokni seat damgnio susajana parakatani ja·man Garo Hills-oba BJP-ko dilenggiparang, Robibar salo tom·aniko ong·atangenba, ma·mongo BJP-ko dilenggiparangni tik ka·anina suk ong·gijaniko parakangtokahachim.
A·dokni Lok Sabha seat damgnio susana gita ma·mongni dilgiparangko didijahani gimin a·dokni mitam BJP dilgiparang, state president Rikman Momin-ni kamnaba kusi ong·gijaniko paraktokahachim.
