SHILLONG: Meghalaya a·dokni Lok Sabha seat damgnion National People’s Party (NPP)-ni candidate-rangna chakpaaniko on·na parakatahani gimin NPP-ni national president aro a·dokni Chief Minister Conrad K Sangma, Bharatiya Janata Party (BJP)-ko mittelpilangaha aro Arunachal Pradesh, Nagaland aro Manipur a·dokrangoba NDA-o bakrimenggipa dolrang ku·cholsan ong·e susaenga ine parakataha.
Shillong aro Tura parliamentary seat damgnion susagija NPP-na chakgen ine adita salrangna skangsan ma·mongni BJP dilgiparang parakatahachim.
Indake ong·engon, Shillong Lok Sabha constituency-ni NPP candidate Ampareen Lyngdoh-na TMC Nongthymmai block baksana gipin biaprangoniba chakpaaniko on·enga ineba NPP-ni national president parakataha.
“Chingna chakpaanirangko on·enggipa pilak political dolrangkon chinga mittelpilna ska aro chinga da·o BJP-ni chakpaanikoba man·engaha. Chinga TMC Nongtymmai Assembly constituency-ni chakpaanikoba man·aha aro gipin biaprangoniba TMC-ni dilgiparang chingna chakpaaniko on·gen ine chinga ka·dongenga,” ine Sangma aganaha.
“Chinga pilakonikon bakrimanirangko man·enga aro sakantikon chinga mittelpilna ska indiba chingo ka·na nangkuenggipa kamrang bang·en dongkuenga. Chingni kamrango chu·sokgipa ong·na gita chinga manderangona re·ange, chingni candidate-rangna campaign ka·angkugen,” ineba ua aganaha.
BJP-na pu·ongiparang lak 1-mangni gita dongani gimin BJP-ni NPP-na chakpaaniko on·enganiara NPP-ko mangrakbatatani gita ong·aha ineba NPP-ni national president parakataha.
Salgro salaram jolo NDA-o bakrimenggipa dolrangni nangrime susaani gimin janapatengon, “A·dok ge·prakon dingtang dingtang dolrangna chakpaaniko on·grikenga, jekai Meghalaya-o NPP-na, Nagaland-o NDPP-na, Outer Manipur-o NPF-na aro Arunachal Pradesh-o BJP-na,” ine Sangma parakataha.
Indake ong·engon, Nagaland a·dokoba NDA-ni candidate-ko susaatani bidingo Chief Minister Neiphiu Rio baksa chanchirimna NPP-ni national president Conrad Sangma aro gipin dilgiparang, Sombar pringo Nagaland a·dokona re·angaha.
