SHILLONG: Ia chang Lok Sabha election-o Bharatiya Janata Party (BJP) gimikchi dam 370 seat-rangko chena man·ahaode ‘Secularism’ ba a·songo dingtang dingtang toromrangni nangrime tangka man·ani ingipa kattakon ra·gale Indian Constitution-kon dingtangatgnok aro India-ko Hindu a·songsa pil·atgnok ine Mongolbar salo, Shillong-ni Lok Sabha MP aro Shillong Lok Sabha constituency-ni Congress candidate Vincent H Pala parakataha.
Mongolbar salo, an·tangni nomination-ko file ka·angani ja·man kobor ra·timgipa manderang baksa agangrikengon, ia election-o BJP, man·a dipet seat-rangko cheenba a·songkon Hindu a·song ong·atnasa miksongengaha ine Pala, mikrakataniko on·angaha.
A·songo gimiko BJP dam 200-na bate seat-rangko chejawa ineba ua aganaha.
“BJP-ni ning·on dilgiparangni gisepo meligrikgijanirang ong·enga aro uamangode salgro salaram jolrango donggipa candidate-rang gita dakgipa candidate-rangba dongja, uni gimin dam 200-na bate seat-rangko cheanide BJP-na namen neng·ani ong·enga. Ia pilakan uamangni manderangko togina jotton ka·anisan ong·enga,” ine Pala aganaha.
Congress MP-ni aganani gitade, batanggimin chang election-o BJP, sak 303 MP-rangko man·ahachim indiba ia changode Maharashtra, Karnataka, Delhi, Bihar, Punjab, UP, Himachal Pradesh aro gipin a·dokrangoba BJP-ni candidate-rang bang·en amako man·gnok.
India a·songni salgipeng jolrango ia chang Congress dol, bang·bata seat-rangkon chegen ineba Shillong-ni Congress MP a·kangataha.
“India a·song gimiko gimiko sak 540 MP-rang donga indiba Indian Constitution-ko dingtangatna gita BJP, sak 362 aro batbewal sak 370-ko nangenga. Iani giminsa uamang sak 370 MP-rang chegen ine a·kangenga. Ian uamangni a·songni manderangko mikrakatani ong·enga maina BJP sak 370 MP-rangko man·ahaode Indian Constitution-ko dingtangatna man·gnok,” ine Pala aganaha.
BJP dam 370 seat-rangko cheahaode Indian Constitution-kon dingtangatgnok: Congress
Date:
Share post:
