SHILLONG: Re·baenggipa April 19 tariko ong·atenggipa Lok Sabha election-o Shillong Parliamentary constituency-oni susana gita Mongolbar salo, da·o ong·enggipa Shillong-ni Lok Sabha MP aro Congress candidate Vincent H Pala-ko man·chape gimik sakbri candidate-rang, an·tangtangni nomination lekkarangko on·angaha.
Mongolbar salo nomination file ka·anggipa candidate-rangara Congress candidate Vincent H Pala baksana UDP aro HSPDP dolrangni nangrime bikotgipa Regional Democratic Alliance (RDA)-ni candidate Robertjune Kharjahrin, Voice of the People’s Party (VPP)-ni candidate Dr Ricky AJ Syngkon aro Independent candidate Prof Lakhon Kma ong·a.
Shillong parliamentary constituency-o ia chang gimik sakdok candidate-rang susaenga aro re·anggipa Sukrobar salosan National People’s Party (NPP)-ni candidate Ampareen Lyngdoh aro sakgipin Independent candidate Peter Shallam-ba nomination file ka·angahachim.
Nomination lekkarangko file ka·ani bon·kamgipa tarikara March-ni 27 tarik ong·enga aro Nomination lekkarangko March 28 tariko Scrutiny ka·angskagen.
Nomination-rangko ra·pilani bon·kamgipa tarikara March-ni 30 tarik ong·skaenga.