So·otanio jak donggipa manderangko rim·na man·kuja: SP
SHILLONG: Re·anggipa Budbar salo, Citizenship Amendment Act (CAA)-ko jegale, KSU aro gipin dolrangni jinma tom·bimonganiko East Khasi Hills a·jani Ichamati-o ong·atangani ja·man mande sakgniko ma·sina man·gijagipa manderang so·ote galangaha.
Sianggipa mande sakgniara Ishan Singh aro Sujit Dutta minggipa manderang ong·achim ine ma·sina man·aha.
Kobor on·timgiparangni u·iatani gitade, CAA-ko ma·mong sorkarini ra·gatangani ja·man salgro salaramni dingtang dingtang a·dokrango dingtang dingtang dolrang jegaltokengani gimin ia cholko ra·e ia manderangkoba so·ote galahakon ine chanchichipenga.
Ichamati-ara Sixth Schedule a·jaan ong·e CAA-oni nangchakeani dongjagenchimoba ia biapo maini gimin CAA-ko jegale tom·aniko ong·atahachim, darangba aganna gita man·tokjaenga.
Iani bidingo KSU-ni saksa dilgipao sing·sandiaton, Ichamati-o KSU-ni tom·aniko ong·ata ingipani giminde ua maming kobor dongja ine parakatskaaha.
Koborko on·ani gitade, CAA-ko jegale tom·bimongani ja·man Budbar attamni 3:30 bajimangon manderang ua biaponi re·angtokahachim indiba Ichamati-o donggipa SBI bank sambao ma·sina man·gijagipa manderang, mande saksako ro·ongrangchi chadrapaha aro ua siangna gita nangaha. Sakgipin mandekoba ma·sina man·gijagipa manderang, adita chel·ao donggipa Dalda-o chadrapskaaha ine kobor on·aha.
A·sel ong·aniko kobor man·soa bakan Special Operation Team, Crime Scene Unit baksa Shella-ni police-rangko dakchakna gita Ichamati-ona re·angaha.
Ia a·selni bidingo East Khasi Hills a·jani Deputy Commissioner SC Sadhu-o sing·sandiaton, Ichamati-o KSU-ni tom·aniko ong·atanio ia a·selara nangeama nangeja, uko police-rang sandirokkuenga ine parakataha.
Indake ong·engon, ia mande sakgniko so·otanio jak donggipa manderangko da·o dipet police-rang rim·na man·kujaenga ine East Khasi Hills a·jani SP Rituraj Ravi, Bristibar salo, kobor ra·timgiparangna parakatskaaha.
SP-ni parakatani gitade, ia a·selni bidingo police-rang sakkirangko man·e, adita sak manderangko chanchichipenga indiba da·o dipet ia manderangko rim·kujaenga.
Ia mande sakgniko so·otani a·selko police-rang sandirokengkua ine janapatengon, ia jolrango tom·tomaniko rakkichina aro dongimin niamrangko ja·rikchina gita SP didiataha.