TURA: Re·baenggipa April-ni 19 tariko ong·atenggipa Lok Sabha election-o 2-Tura Parliamentary Constituency-oni susana gita candidate-rangni file ka·anggipa nomination lekkarangko Bristibar salo scrutiny ka·aha ba nipilangaha aro scrutiny-ko dakanio nomination file ka·gipa candidate-rangoni darangba jegalako man·jaha ine Bristibar attamo, 2-Tura Parliamentary Constituency-ni Returning Officer aro West Garo Hills a·jani District Election Officer Jagdish Chelani u·iataha.
Tura Lok Sabha constituency-oni susana gita gimik sakbri candidate-rang nomination file ka·ahachim aro uamangara, da·o ong·enggipa Tura-ni MP aro National People’s Party (NPP)-ni candidate Agatha K Sangma, Indian National Congress (INC)-ni candidate Saleng A Sangma, Trinamool Congress (TMC)-ni candidate Zenith M Sangma aro Independent candidate Labenn Ch Marak ong·achim.
Indake ong·engon, nomination-ko ra·pilani bon·kamgipa tarikara March-ni 30 tarik ong·enga aro Meghalaya a·dokni Lok Sabha constituency damgni, chong·motan Shillong aro Tura Lok Sabha constituency-o April-ni 19 tariko pu·onanggen.
Counting ba channaniko re·baenggipa June jani 4 tariko a·songni pilak Lok Sabha constituency-rangon dakangskagen.
