TURA: BJP-ni state vice president aro Garo Hills Autonomous District Council (GHADC)-ni gitcham chief executive membor (CEM) Dipul R Marak, National People’s Party (NPP)-o napangani ja·man, NPP-ni membor aro GHADC-ni gitcham CEM Denang T Sangma, Congress dolo napangskaaha.
Congress dolo napanggipa Denang Sangma, ru·uta bilsirangnan NPP-ni membor ong·e kamko ka·ahachim indiba da·o Lok Sabha election-na skang ua, Congress dolo napangskaaha.
Sangma, an·tangna kam ka·enggipa bang·bea manderang baksa Congress dolo napangaha aro ian Lok Sabha election-o Congress dolni candidate Saleng A Sangma-ko bilakbatatani gita ong·aha.
Sangma aro uni manderangko Bristibar attamo, Meghalaya Pradesh Congress Committee (MPCC)-ni working president aro Williamnagar-ni gitcham MLA Deborah C Marak baksana Congress dolni gipin dilgiparang Congress dolona rimchaksoaha.
Ia bilsini Lok Sabha election-na skang, dingtang dingtang political dolrangoni gipin political dolrango napanganiko bang·en nikna gita man·engahachim.
