SHILLONG: Meghalaya a·dok bilsi 50 gapgenchimoba private hospital-rang bang·gijasan dong-kuaienga aro nambatgipa sana banani cholrangko on·a miksongan baksa ARHI hospital-ko Sonibar salo oprakaha jeon salgro salaram a·dok gimiko aro Jorabat biaprango aro Mawsmai-ni wilwilao donggipa manderangna namgni ong·gen.
Sonibar salo Me-ghalaya Animal Husbandry aro Veterinary Minister AL Hek, ARHI hospital-ko an·tang biaptango oprakna miksonge dakaha. “Man-dena dangdikan, Isolna dangdika,” iako bebe ra·an baksa hospital-ko ra·bana miksongaha ine Hek janapataha.
North East Cancer Hospital-ni mikkangchakgipao palang ge-200 donggipa private hospital-ko kuliaha. Re·baenggipa adita jarango multi-speciality dake iako chu·gimik chalaiangna ka·dongsoenga. Da·o dipet sagiparangko nina sak 32-35 specialist-rangko kamo rakkiaha. Doctor-rangko bang·bate ta·raken sak 100-ona baridapatna ka·dongsoenga. Hospital-ni bako sak 300 nurse-rang aro medical technician-rangko rakkiangenga.
“Nurse-rangko Meghalaya a·dokonikosan rakkienga ong·ja indiba Assam aro salgro salaram a·dok gimikoniko rakki-angenga,” ine Hek agan-angaha.
ARHI ian dingtangmancha namgipa simsakgipa hospital ong·a jeon nam-batgiparangni dingtang dingtang centre-rang donggen jekai Cancer centre-rang, cardiac centre-rang aro dingtang dingtang gipin centre-rang donggen, ine board-ni member aro hospital-ni specialist Dr. Feroze aganaha.
Department aro spe-cialist ge·antian nambatgipa ong·gen indiba manderangni namgnina ong·-gen, ine neurosurgeon-ni Dr. Simranjeet Singh aganaha. “An·tangtangni centre-rangko nambatgipa dake ong·atna sakantian jotton ka·anggen. Ian hospital aro manderangna dakchakani ong·gen aro ian ramramgipa nisanna ong·gen jeon sakantini nam-gnina aro maiko dakenga uako nambate kam ka·angani ong·a. Nambatgipa simsakaniko on·naan chingni nisan ong·a,” ine Dr. Singh aganaha. Private kuligipao ka·tong surgery gimikko dakna man·a ian Meghalaya a·doko ian skanggipa hospital ong·chenggen ine Cardiac specialist, Dr Bikash Rai Das u·iataha. “Da·o dipetonade, NEGRIHMS-osan dongaia jekon sorkarini tiktak dakan baksasa kuliaha. Ian skanggipa changna private hospital-ko kuligipa ong·enga jeon dingtang-mancha ka·tong sagiparangko operate ka·angna man·gen. Sagipa manderang aro sagipa nokdangni manderang Mumbai ba Delhi indakgipa dingtang dingtang biaprangona sana bananiko dakna songreanga indiba da·ode ia ARHI-o gimik dakgipa machine-rangko donan baksa sako nina man·gnok,” ine Dr. Das aganaha.
