RESUBELPARA: South Garo Hills a·jani biap damgnio rim·gittanga man·gipa mande sakgniko police-rang jokatna man·ani ja·man North Garo Hills a·jaoba rim·gittanga man·gipa mande saksako police-rang, uko rim·gittanganio adita kontarangni gisepon jokatpilna man·aha.
Police-rangni kobor on·ani gitade, Robibar pringwalni 12:30 bajimango, Kharkutta police station-ni ning·o donggipa Wageasi Abrong songni bilsi 26 ong·gipa Leeku G Momin-ko sak 7 ba sak 8 manderang, uni Nokpante tuengmiting somoio rim·gittangangahachim.
Ia mandeko rim·gittangangani bidingo koborko man·soani ja·man North Garo Hills a·jani police-rang, CAPF (Mendipathar)-ni 120 Battalion, ta·raken uko sandina a·bachengataha.
“Ia mandeko rim·gittangangani bidingo koborko man·soani bak tapan chinga uko sandina a·bachengatenba uko Wageasi Abrong songni buring sambaoniko jokatpilna man·aha. Ia mandeni aganani gitade, uko rim·gittanganio sak 7 ba sak 8 manderang donga aro chinga ia manderangko rim·na gita sandiengaha,” ine North Garo Hills a·jani SP Bruno A Sangma parakataha.
Ia mandeko rim·gittangangani somoio ia manderang an·tangtangni mikkangrangko katipachim aro da·o dipet uamangoni darangkoba rim·na man·kujaenga ineba Sangma parakataha.
Da·o dipet ia mandeko rim·gittangani a·selko ma·sina man·kujaengaoba uamangni gisepo bobil ong·grikani gimin ong·engnaba gnang ine SP, an·tangtangni chanchichipenganiko parakataha.
Adita salrangna skangsan South Garo Hills a·jaoba police-rang, skanggipa Siju jolo rim·gittanga man·gipa mande saksako aro uni ja·man Chokpot joloba rim·gittanga man·gipa sakgipin mandeko jokatna man·ahachim.
