SHILLONG: Meghalaya a·dokni skotong Shillong songjinmaoni a·songni skotong New Delhi songjinmaona salantian sildoreng bilruraatna gita a·dok sorkari manchienga.
Iani bidingo kobor ra·timgiparangna u·iatengon, Shillong-oni New Delhi-ona direct flight-ko watna gita a·dok sorkari, dingtang ramarangko sandidapna miksongenga ine Sombar salo, Transport department-ni Commissioner & Secretary Sanjay Goyal parakataha.
Shillong-oni Bangalore, Chennai, Mumbai, Hyderabad aro New Delhi-onaba direct flight-rangko watna gita adita salrangna skangsan tender-rangko on·ahachim ine nikna man·a.
Da·o dipet Shillong-oni New Delhi-ona antio changgni dakesan direct flight-ko watkuengachim ineba nikna man·a.
Sildoreng gita songre songgabatanio koros aro somoikoba komiatna man·ani Shillong-oni sildoreng gitan songre songgabatchina manderangko didiatengon, songregiparangna korosko sorkari bewalan gamchakenga aro manderang, Shillong-oni New Delhi-ona gong 7000 koroschin bilrurana man·aigen ine Goyal parakataha.
Shillong airport-ko dal·batatani gimin janapatskaengon, Shillong airport-o dal·kalbatgipa sildorengrangko bilonatna gita technical study-ko dakna Airports Authority of India (AAI)-ni gita tender-ko on·aha ine Goyal aganaha.
Iani bidingo report-ko da·o ja 4-ja 6-ni gisepon a·dok sorkarina on·na ka·dongenga ineba ua aganaha.
Da·o dipet Shillong airport-o ATR 72 aircraft-rangkosan jakkalna man·engkuachim ine nikna man·a.
