SHILLONG: Meghalaya Assembly-ni Opposition dolrang dolsan ong·e bakrimjagenchimoba pilak kamrangon ku·cholsan ong·en ku·rang on·enga ine Leader of Opposition (LO) aro Congress Legislature Party (CLP)-ni dilgipa Ronnie V Lyngdoh parakataha.
Opposition dolrangni gisepo bakrimani donggenma ine sing·anina ua ia kattarangko aganchakaha.
Meghalaya a·doko dolgittam political dolrang, chong·motan Congress, Voice of the People’s Party (VPP) aro Trinamool Congress (TMC) dolrang opposition-o ong·engachim ine nikna man·a.
“Batanggimin chang Assembly session-oba chingni gisepo bakrimani dongjagenchimoba chinga dingtang dingtang nanganirangna ku·cholsan ong·en ku·rangko on·aha,” ine Lyngdoh aganaha.
Lyngdoh-ni aganani gitade, Assembly-ni niamrangko name ja·rikjaenga ine Dr Celestine Lyngdoh-ni Assembly-o chanchirimaniko ra·baani somoioba pilak dolgittam opposition dolrangan una chakpaaniko on·aha aro apsanan Assembly-oniba ong·katgrime katahachim.
Opposition dolrangni gisepo dolsan bakrimgenchimoba VPP-de bak ong·pajawa indiba manderangni nanganirangnade ku·rangko on·aigen ine adita salrangna skangsan VPP-ni dilgiparang parakatahachim.
“Opposition dolrangni dolsan ong·e bakrimanio chinga bak ong·pana sikja maina chinga ia apsan bakrimgipa dolo ong·ahaode gipin dolrangni chanchianirangko mande ra·na nanggnok. Badiaba kamrangode chingni chanchianirang meligrikjanaba gnang,” ine VPP-ni president Ardent Miller Basaiawmoit aganahachim.
