SHILLONG: Umiam dam-ko taridapani kamrang May jaon matchotgen ine Sombar salo, Meghalaya Energy Corporation Limited (MeECL)-ni Chairman & Managing Director (CMD) Sanjay Goyal parakataha.
Ia Umiam dam nosto ong·angengahani gimin ia dam-o donggipa dolongko mangrakbatatna gita taridaptaiengahachim aro ia kamko sorkari, June jani gisepo matchotatna gita somoiko donsomanahachim.
Indake ong·genchimoba, kamrangko da·o ta·raken ka·na man·engahani gimin Umiam dam-ko taridapani kamrang May jani gisepon matchotgen ine Goyal parakatskaaha.
Ia Umiam dam-ko taridapengahani gimin ia dolongko da·o bilsi 30 ba bilsi 35-mangna baidapgnok ineba MeECL-ni CMD parakataha.
Ia Umiam dam-ko tarina gita re·anggipa Robibar salo pring 7:30 bajioni attamona kingkinga chipe donahani a·sel, ia dolong gita re·ruraenggipa gari gorarang neng·nikanirangko chagrongna nangtokahachim ine nikna man·a.
Ia Umiam dolongko taridapna gita Robibar salo, pring 7:30 bajioni attam 2:00 bajiona chipe dongen ine adita salrangna skangsan sorkari u·iatahachim indiba Robibar attamo ia dolongko donsogimin somoina baten chipe donahani a·sel ia ramao gari gorarangni bang·en riting dake senganiko nikna man·aha.
March-ni 31 tarik pring 8:00 bajioni attam 2:00 bajiona ambulance-rangna agrede gipin garirangko ia dolong gita re·na on·jawa indiba kamrang matchotani ja·man March 31 tarikoni April 8 tarik pring 7:00 bajionade ton 4 jregipa garirangkosan ia dolongni ka·ma gita re·na watskagen ine adita salrangna skangsan sorkari official-rang u·iatahachim.
April 8 tarik pring 7:00 baji dipetde ton 15-ona jregipa garirangkoba Umiam dolongni ka·ma gita re·na watskagen ineba official-rang u·iataha.
