TURA: Garo Hills a·jani sak 16 chadamberangna Mumbai songjinmani private company-o kam on·gen ine rimangenba, ua biapo uamangko galchipe donaha ine ACHIK Krima Council Southern Zone matnangatenba, ia chadamberangko togigipa Assam-ni mande saksani kosako FIR ka·doangaha.
Iani bidingo ACHIK dolni gita, Assam a·doko donggipa Pandoba Remakona songni saksa Pijush R Marak minggipa mandeni kosako Baghmara Police Station-o FIR ka·aha.
FIR-o ACHIK dolni parakani gitade, Mumbai songjinmao donggipa Elenti Pvt Ltd Company-o kam on·gen ine Pijush Marak, Garo Hills a·jani sak 16 chadamberangko rimangahachim indiba ua biapona sokangani ja·man ia chadamberangko nirok sandiani gri aro dormaharangkoba on·gija donenga.
Mumbai songjinmao sokangani ja·man ia chadamberang neng·nikanirangko man·engani gimin Pijush-na phone ka·e dakchakanirangko on·china mol·molahachim indiba ua uamangni mol·molaniko knachakna gisik nangjaha aro ua biapo jachange dongna nangenggipa chadamberangko Garo Hills-ona sokatpilna gitaba maming ja·kurangko de·jaha ineba FIR-o ACHIK dol parakataha.
FIR-o parakani gitade, matnangako man·enggipa Pijush Marak, ia company-o ‘broker’ ong·e kamko ka·engachim.
Mumbai songjinmani company-o kam on·gen ine cha·bokako man·gipa chadamberangara, South Garo Hills a·jao donggipa Mahadeo songni Senbar A Sangma, East Garo Hills a·jao donggipa Rongsak songni Rakkam T Sangma, Chokpot (SGH)-ni Kuksan Ch Marak, Rongsak (EGH)-ni Kismat Ch Marak, Rongsak (EGH)-ni Silman Ch Marak, Rongsak (EGH)-ni Tengsubirth R Marak, Rongara (SGH)-ni Brenian N Marak, Rongara (SGH)-ni Jense N Marak, Rongara (SGH)-ni Chanang T Sangma, Rongara (SGH)-ni Manrik R Marak, Rongara (SGH)-ni Checheng T Sangma, Rongara (SGH)-ni Juli N Marak, Bajengdoba (NGH)-ni Toseng D Sangma, Bajengdoba (NGH)-ni Tengjim B Marak, Bajengdoba (NGH)-ni Breliant P Marak aro Bajengdoba (NGH)-ni Gutren D Sangma ong·achim.
Ia chadamberangko Garo Hills-ona rimbapilchina aro dos dakgipa mandeni kosako rakgipa ja·kurangko de·china gitaba ACHIK Southern Zone, FIR-o didiataha.