SHILLONG: Meghalaya a·dokni Lok Sabha constituency damgnion susagija National People’s Party (NPP)-ni candidate-rangna dakchakskachina gita ma·mongni dilgiparang ge·etaniko on·ahaoba, Garo Hills-o BJP-ni worker-rang aro dilgiparangde NPP-ni candidate Agatha K Sangma-na kamrangko dakchake on·na neng·nikskatokenga ine kobor on·aha.
Meghalaya a·dokni Lok Sabha seat damgnio, mongsongbate Tura Lok Sabha constituency-o susajana tik ka·angahani gimin Garo Hills-o BJP-ni bang·bata dilgiparangan, BJP high command-ni kamna suk ong·gijaniko paraktokahachim ine nikna man·a.
Indake ong·engon, Garo Hills-o NPP-ni candidate-na dakchakanirangko on·na skang, BJP-ni dilgiparang aro party-na kam ka·enggipa manderang, NPP-ni candidate baksa apsan tom·aniko ong·atchina nangniktokenga ine Garo Hills-o BJP-ni saksa dilgipa parakataha.
Ia dilgipani parakatani gitade, adita salrangna skang NPP-ni national president aro a·dokni Chief Minister Conrad K Sangma baksa BJP-ni dilgiparang Shillong-o tom·aniko ong·atangani ja·man Mongolbar salo, BJP-ni state president, Garo Hills-ni BJP dilgiparang baksa Tura-oba tom·aniko ong·atangahachim indiba ia tom·anio chanchirimanirangko BJP-na kam ka·enggipa bang·bata membor-rangan chu·ongniktokjaha.
“Ia tom·anio chanchirimanirang chu·soksranggipa ong·jahaoba chinga mikkangchi tom·e chanchirimanirangko dakna miksongkuenga aro chinga bebera·a Lok Sabha election-na skangde ma·sichakgrikanirang ong·katnaba gnang,” ine BJP-ni saksa dilgipa aganaha.
Koborko on·ani gitade, ia tom·aniko BJP-ni state president Rikman G Momin dilangaha aro tom·anio BJP-ni bang·bata dilgiparangan bak ra·angtokaha.
