SHILLONG: Budbar pringwalo, Shillong songjinmani Mawlai Police Station a·palo donenggipa police-rangni Gypsy gari bolsako, ma·sina man·gijagipa mande sakbonga, petrol boma godapenba wa·al kamataha.
Ia a·sel Budbar pring 2:00 bajimango ong·aha aro police-rangni u·iatani gitade, ua somoio mande sakbonga, chakka samgni donggipa garirango re·baenba, Mawlai police station a·palo donenggipa gypsy gariko petrol bomachi godapangaha.
Rasong gnangbee ia a·sel ong·anio darangba saknaanirangkode man·jaha.
Iani bidingo police-rang mokordoma ka·enba, dos dakgipa manderangko sandina a·bachengataha ine u·iataha.
Adita salrangna skang, Ichamati-o gipin jat mande sakgniko so·otanina Khasi Students Union (KSU)-ni membor sakgniko police-rang rim·ahachim.
Niamo pangchakesa sorkari kamrangko ka·enga ine iani bidingo maming so·sojengjeng ong·atani kamrangko ka·jachina gita a·dokni Deputy Chief Minister aro Home Minister Prestone Tynsong, dingtang dingtang dolrangko mol·molatahachim.
KSU-ni membor sakgniko rim·ani gimin denggu dakgipa manderang ia cholko ra·e so·sojengjeng ong·atani cholrang donga inenba police-rang, Shillong aro dingtang dingtang biaprango chel·chakanirangkoba bariatahachim.
