SHILLONG: Ichamati-o gipin jat sakgniko so·otgipani bidingo Khasi Students Union (KSU)-ni membor sakgniko police-rang rim·ani ja·man Budbar salo KSU-ni membor-rang, rim·a man·gipa mande sakgnini nokdangrang baksa Sohra police station-ona jinma re·jomangenba, KSU-ni membor sakgniko watpilchina dabiangtokaha.
Sohra police station-ona re·jomaniko KSU-ni assistant general secretary Rueben Najiar aro KSU South Khasi Hills District-ni president Reebok Diengdoh dilangaha aro re·jomanio jolo songdongenggipa bang·bea manderangba bak ra·angtokaha.
Police station-ona sokangon, police-rang ta·raken mande jinmako gate-o champengsona man·aha aro adita somoirangna dolgni jegrikani ja·man KSU-ni dilgiparangko aro rim·a man·gipa mande sakgnini ma·drangrangko agangrikna police-rang okamataha.
Police-rang baksa agangrikani ja·man kobor ra·timgipa manderang baksa agangrikengon, uamang KSU-ni membor-rangko skatang ‘potchipe’ rim·aijachina dabiangaha ine KSU-ni assistant general secretary Najiar parakataha.
“Beben chinga police-rangni sandirokanio jak on·na bil dongja indiba police-rang an·tangtangan chingni membor sakgniko, ‘mobile location’-o pangchakesa chanchichipe rim·aha ine parakaha. Uni gimin chinga iandake potchipe rim·aniko raken jegalaha aro chingni membor sakgniko watpilchina dabienga,” ine ua aganaha.
March-ni 27 tariko Citizenship Amendment Act (CAA)-ko jegale KSU-ni Ichamati-o jinma tom·bimonganiko ong·atanio KSU-ni bang·a membor-rangan dongpae bak ra·ahani gimin bang·bata membor-ni mobile location-rangkon mesokaigen ineba Najiar talataniko on·angaha.
“KSU-ni membor-rang bang·batan ua somoio bak ra·tokahani gimin tower location-ode membor gimikkon mesokaigen. Uni gimin bilakgipa sakkirangko man·chenggijade chingni membor-rangko rim·jachina chinga dabienga. Police-rangni chingna aganatani gitade, uamang da·o kosakoni ge·etanina sengkuenga,” ine KSU-ni dilgipa aganaha.
Ua somoio CAA-ni niamrangko segimin lekkarangko so·e galani ja·mande KSU-ni membor-rang pilakan ua biaponi re·angpiltokaiahachim ine janapatengon, “Ia mande sakgniko so·otani bidingo chingade mamingkon ma·sipaja indiba badiaba dolrangsa KSU-ko biming man·atna gita ia kamko ka·aha ine chinga chanchichipenga,” ine Najiar aganaha.
KSU-ni membor sakgniko walni somoio rim·ahani giminba KSU, police-rangni kamko raken jegalataha.
“Police-rang chingni membor-rang baksa agan-golpogrikna nangnikenga ong·ode je somoioba chingko okamataibo aro chinga re·baaigen inen chinga aganmanjok. Ia a·sel ong·anio chinga dos dongjaode maini gimin chinga kenna nanggen,” ine KSU-ni assistant general secretary aganaha.
