TURA: Mumbai songjinmani private company-o kam on·gen ine togiako man·e Mumbai songjinmao jachange dongna nangenggipa Garo Hills-ni sak 16 chadamberangko Mumbai police jokatna man·aha aro da·o ia chadamberangko noktangtangona sokatpilna gita police-rang, uamangni ma·drangrang baksa agangrikengaha ine kobor on·aha.
Mumbai songjinmao donggipa Elenti Pvt Ltd Company-o kam on·gen ine saksa Pijush Marak minggipa mande, Garo Hills-ni sak 16 chadamberangko rimangahachim indiba ua biapona sokangani ja·man ia chadamberangko nirok sandiani gri galchipe donaha ine salsa skangsan ACHIK Krima Council Southern Zone u·iatahachim.
Mumbai songjinmao sokangani ja·man ia chadamberang neng·nikanirangko man·engani gimin Pijush-na phone ka·e dakchakanirangko on·china mol·molahachim indiba ua uamangni mol·molaniko knachakna gisik nangjaha aro ua biapo jachange dongna nangenggipa chadamberangko Garo Hills-ona sokatpilna gitaba maming ja·kurangko de·jaha ineba ACHIK dol parakatahachim.
Mumbai songjinmani company-o kam on·gen ine cha·bokako man·gipa chadamberangara, South Garo Hills a·jao donggipa Mahadeo songni Senbar A Sangma, East Garo Hills a·jao donggipa Rongsak songni Rakkam T Sangma, Chokpot (SGH)-ni Kuksan Ch Marak, Rongsak (EGH)-ni Kismat Ch Marak, Rongsak (EGH)-ni Silman Ch Marak, Rongsak (EGH)-ni Tengsubirth R Marak, Rongara (SGH)-ni Brenian N Marak, Rongara (SGH)-ni Jense N Marak, Rongara (SGH)-ni Chanang T Sangma, Rongara (SGH)-ni Manrik R Marak, Rongara (SGH)-ni Checheng T Sangma, Rongara (SGH)-ni Juli N Marak, Bajengdoba (NGH)-ni Toseng D Sangma, Bajengdoba (NGH)-ni Tengjim B Marak, Bajengdoba (NGH)-ni Breliant P Marak aro Bajengdoba (NGH)-ni Gutren D Sangma ong·achim.
Indake ong·engon, ia chadamberangko jokatna gita ta·raken kamrangko ka·ahani gimin police-rangko ACHIK dol mittelpilataha.
